Da i ktien Lamin rai ka SKL wow pynemkaam chwa i pyrtuid kpoh

Amlarem: Ka dorbar yong ka Seng Kur Lamin (SKL) kawa da man ynnin ka 27 tarik ha ka Enowell Hall, Amlarem chirup wa kiwi ki rai ka Seng Kur Lamin da rai ko wa neini chakhmat u pynemkaam noh da ka kur Lamin hakhmat yong ka pyrtuid Kpoh khnang yow lait na i ya bakla.

Yeini da leh neibhah wa ka kur Lamin ha ki thaiñ War Jaiñtia toh kawa boon pyrtuid kpoh kawa em hadooh 43 tylli wei i pynemkaam da i kur kpoh da wanrah ko yei kulmar neibhah ki khynnah wa ki khynroo khyllood ym yatip de ki para kur.

Kam ka nongmuna hapoh ka kur Lamin em ki Pohsnem, ki Pohchen, ki Pohlynjar, ki Paduna, ki Gassah, ki Gashnga, ki Gadew, ki Gayang, Gadiang, ki Myrmen, Mohrmen, ki Pohiing, wa kiwi kiwi kiwa e Lamin.

Hadien wa tyrwa u Dr. Bareh Pohchen wa u Dr. Henry Lamin uwa man u Pro Vice Chancellor ka NEHU, da pdiang wa neini chakhmat u pynemkaam ya i kur Lamin hachwa yong i pyrtuid kpoh kam ka nongmuna Lamin Gadew, Lamin Pohtlynjar, Lamin Myrmen kamtæ ter ter.

Related posts

Daw pynman ya ka General Meeting wa nyngkong ka Kur Sumer Pyllun ha Amlarem

November 23, 2024

Dei kreh yonglang pynkhreh ka Seiñ Raij Raliang ya ka Kopati Puja

November 17, 2024

Ka SKL leh da ong ko wa katkam ka riti krehkaam ka kur ymchah de ya kiwa chim kur na u pa wow man ki kam ki dkhot wa pura ka Kur.

Ha kani ka yalang da pdiang leh ya ka Riti krehkaam ka Seng Kur wa da tyrwa da u Rev. H.H. Mohrmen.

Hadien ini da yoh yei klam na u Dr. Bareh Pohchen wa u Dr. Henry Lamin wei da pynthymne ya kiwa kitkaam yong ka heiwa da jied ya u Chui Lamin Pohlynjar (Daloi eleka Nongtalang) kam u President, u Samuel Lamin Gadiang kam u Vice President, u Wansuk Lamin Gashnga kam u General Secretary, u Rev. H.H. Mohrmen kam u Assistant Secretary, u Paul Lamin kam u Finance Secretary chirup wa ki 22 ngut ki Executive Member. Da jied leh ya u Dr. Bareh Pohchen, u Dr. S.M. Pohsnem wa u Dr. Henry Lamin kam kiwa ebuit ka seiñ.

Da puræ leh ya ka General Report na u General Secretary ka SKL u Jim F. Pohsnem wa ya ka Audit Report na u Andrew Gashnga.

U Dr. Pohchen da khana u chaphang ka seiñjait yong ki, ka Iawshibidi/Shibjai na kawa mih ka kur Lamin, Laloo wa Diengdoh kiwa da mih wei da yutchnong ki cha Raid Ïapngar wei ki khon ki ksu yong ki em ki kylleiñ katni.

Da khana u leh wa katni ha ki thaiñ Ïapngar dang em kitæ ki Chrah Lamin, næ ki Lynrem Lamin kiwa haap hapoh ka thaiñ Block Two yong ka Assam.

Ha kani ka yalang da wan kamwa Chihajarngut na ka kur Lamin wei ya ka Dorbar da pyllai da u Dikil Lamin Pohchen.