Hadooh le sien haap wan lithooh sboh ki paidbah na Khliehriat: SBYWA

Khliehriat: Ka Southern Border Youth Welfare Association (SBYWA), kawa haap hapoh Elaka Rymbai & Lakadong, East Jaiñtia Hills District, Khliehriat, kawi na ki seiñ wa pait wa sylli yei eh i khoo yong ki paaidbah ka thaiñ khappood ka ri kawa chakri ya ki chnong wa boon kamwa 27-28tylli ki chnong nadooh ka chnong Iapmala, Suchen Pyllun, Lumskhem, Umsatai, Pynurkba, Bataw, Umlyngsha, Lakadong, Lama, Borkhat -Hingaria–Huroi wa kiwi kiwi de ki chnong wa marjan heiwa ka seiñ da yoh ko yei ujor na ki paidbah wa rep wa riang yong ka thaiñ hawa yatoh wa haap ki wow wan lithooh sboh hadooh le sien wow yoh yei sboh wa chi churia na Khliehriat nadooh ka 22 tarik, 26 tarik wa ka 29 tarik uni u bnai.

Kamtæ ka seiñ da pynap ko yei sñiawkhia wa joor heiyatoh weini i rukom saam sbooh ka tnat Agriculture Department, EJHD cha ki paidbah yong ka District hawa haap wan ki hadooh le sien wow yoh chi churia i sboh kba heiwa da ktah ko ya ka kamai kajih, ka bai kari, ka bai baam wa ka nongsngi neibhah wa haap u pynlut boon sngi yei por yong ki neibynta wow yoh yei sboh khamtam ki paidbah da yaleh chitom ki wow pyllait ya ki por wa kordor wow wan cha Khliehriat neibhah kattu da jan toh ki por thung por tep yong ki ha jar ha jiar ki hali ki lyngkha tangwa da ood da naam ki wa da saja da chitom ki wow wan boonsien, da ong u S. Shadap uwa man kam u President ka SBYWA.

Tæ hei sakhiat, ka seiñ ym em kwah ko wow pynbaad ya kani ka tnat krehkaam (Agri. Dept EHJD) næ ya i rukom saam sboh kba ko tangwa hadien wa ka seiñ da sñiaw ko yei ood yei naam ki paidbah wa rep yong ka thaiñ ha kani ka bynta kamtae da mih ko cha khmat wow kyntu ko ya kani ka tnat wow yaleh ko deiwa pynduna u phah wan boon sngi ya ki paidbah khnang wow lait ko u ktah kylla ya ki.

“Lada heini i dur hawa hadooh le sien haap wan kiwa rep cha Khliehriat da ryngkat i dor sboh wa dai cha dukan ki bru samen bar iwa saam ka sorkar, neibhah i dor i sboh toh T. 600 kamwa khana kiwa rep tæ lada kheiñ ya ka bai kari bai baam?” da ong u S. Shadap.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Khaddooh ka seiñ da kyntu ko ya ka tnat wow thooh ya ki laad wow pynsuk ya ki paidbah hawa saam sboh kani ka tnat.

Kani toh katkam ka khubor na u Namphrangmi L Talang, General Secretary ka SBYWA, EJHD.