Jowai: Ka Jaiñtia Students Movement (JSM) Central Body ynne ka sngi da pynsñiaw ko yei pyrchah yei chna Mosque hapoh West Jaiñtia Hills District.
Katkam i ong u President ka JSM Central Body u Leniningstar Rymbai, ka seiñ da khyrngiat ko hadien wa yoo u yei message ha “WhatsApp” wa ong wa u Sayeedullah Nongrum, President ka Shillong Muslim Union da wai u ka ka Mosque ha Jowai ha ka 9 tarik uni u bnai heiwa da emlang ki spah ngut ki Muslim ha i thaw wa em ha rood wah Myntdu wa dai u Shai Suchen cha u Sayeedullah.
Katkam i thooh tre ka seiñ da chem ko wa ya ka Mosque da sdang chna da ki tin (CGI Sheets) ha i thaw wa haap hapoh u pood u ang ka Newhill Dorbar Chnong wei jngai i du kamwa 50m na ka wah Myntdu. Kiwa chna katni dang kreh ki ya ka luti cha kani ka thaw wei kamjooh ki paikhana.
U Rymbai da ong u wa da dep yachem u wa u Waheh Chong ka Newhill yow kylli chaphang ini, da jubab u wa ym tip u chaphang ini i dai thaw wei daw chong pyrkhat ka Dorbar Chnong hei yatoh wa ini yow chem tre yeini.
U Rymbai da ong u leh wa ka seiñ JSM daw rah ko yeini i kaam ha ka JHADC kamjooh waka Revenue Department, West Jaiñtia Hills.
U Rymbai da kylli u leh wa hadien waka NGT East Zone da pynmih hukum wym chah de u chna ya iyi iyi harood ka Wah Myntdu kammon won dang chah wow chna ya kani ka Mosque?
Discussion about this post