Nongpoh: Kiwa pathai khubor yong ka Ri-Bhoi District, ha ka yachem yong ki ynne ka sngi ha Nongpoh, da beiñ joor ki yeiwa hukum ki pulit ya u Cornelius Laloo, uwa thoh khubor u Mawphor kamjooh uwa riñdur u PCN, ha u Investigating Officer ka Nongpoh Police Station u SR Marak hei yatoh wa i jia ha ka 27 Tarik u Naisan ha chnong Ronghona.
U Cornelius Laloo da yoh pdiang u ya ka chithi wa da soi da u Investigating Officer ka Nongpoh Police Station kawa phah bait cha u Cornelius Laloo, khlem da pyntip ya ka kot khubor wa kreh u kawa hukum ya oo wow pynbiang ya ki dur wa ki video hei yatoh wa i jia ha Ronghona, ha namo chwa ka 18 tarik uni u bnai. Ha katai ka chithi leh da maham leh wa lada ym pynbiang u ya kini daw pynngat ya oo ha ki kyndon ka aiñ.
Hawa yachem kiwa pathai khubor ya u SR Marak da ong wa da phah ya kani ka chithi katkam wa da hukum u SP ka Ri-Bhoi wei da phah pyndam u ka kani ka chithi wei daw kyrpaad u ya u SP wow phah ya ka chithi cha u Editor namo u tre kotkhubor.
Kiwa pathai khubor da beiñ joor ki yeini i leh ki pulit iwa ym em de burom ki ya ki hok kiwa pathai khubor wei da pyntip ki leh wa ha kini ki sngi wa da dep uwi u muktiar wa yasaaid neibynta ka KSU da chah phah hajir u ha ki pulit hajrong ka yurim wa yasaaid pyrchah u ya ka kaamram yong oo kam u muktiar uwa toh wow yasaaid hapoh ka yungbichaar.
Discussion about this post