Shillong: Ka Central Election Committee (CEC) ka Khun Hynniewtrep National Awakening Movement (KHNAM) ynne ka sngi hadien wa pyndep ki ya ka yalang da rai ki wow dam noh u kyrchaan ya ka People Democratic Forum (PDF) hapoh ka Khasi Hills Autonomous District Council kawa em hei bor synchaar.
Ka yung dorbar ka KHADC u sdang ko ha ka 20 tarik uni u bnai heiwa u Pyndap Saiborn u President KHNAM da pyntip u wa i daw wow pyndam noh yei kyrchaan ya ka PDF toh wa ym ye ka PDF u pynkylla ya ka AD rules (section 128) kawa e laad ya ki barjylla wow chimbynta ki ha ki Election ki District Councilwa, ki boon boon tylli ki Trading License wa da e wa man be-aiñ hapoh i yahkhmat ka PDF u P N Syiem u CEM ka KHADC.
“Ka party da yaklam bniah ki heiyatoh wa ini waroh wei neidaw ym ye u pynkylla ya ka AD Rule nadooh u snem 2016 kamjooh u pyndam ya ki Trading license wa da e da ka Executive Committee (EC) wei kiwa boon toh ki wym biang ki kot ki sla wei da chem leh ya ini da kawi ka seiñbhalang kamtæ da rai wow dam noh u kyrchaan ya ka PDF,” da ong u Saiborn.
“Lada ka PDF pteiñ ko hei synchaar ki paidbah ka jylla daw piah daw pra ki,” da ong kiwa yahkhmat ka KHNAM.
U James Ban Basaiawmoit u MDC ka KHNAM na Pynthorumkhrah Constituency ym em u ha kani ka yalang.
Manda kylli neiyi i daw wa ym em u, da jubab wa em ki kaam yong oo wa haap leh u kamtæ ym em lang u ha kani ka yalang ka Party.
Hei yatoh won wa u Basaiawmoit daw neh u wa ka party neibhah oo da pynsñiaw u yeiwa kwah u mih naka party, da jubab wa oo dang man hi u u dkhot ka KHNAM wei i rai wow dam noh u kyrchaan ya ka PDF haap ngait u ki.
Ka KHNAM leh da ong ko wa kiwi de ki daw wa chim ya kani ka rai toh wym ye u pynman aiñ ya ka Village Administration Bill (VAB) wa ki kaam heiyatoh wa ka MUDA.
Discussion about this post