Shillong: Ka Khasi Students’ Union (KSU) ha ka khubor wa da phah ko da pynsñiaw ko yei leh pyrchah ka District Administration ka Ri Bhoi lyngba ka Police Depatment heiwa da yoohbeiñ yei hok ki dkhot ka KSU wa ki paidbah ha ka 27 Naisan ha Shangbangla wa ha Nongpoh heiwa da e hukum ya ki pulit ka CRPF wa ki pulit ka jylla wow dat u bom ya ki khlem em ki daw.
“Ki dkhot ka seiñ ym em ki kawon kawon ka daw wow pynyoobor ya ka District Administration tangwa ki pulit da dat khiar ki ya kini ki dkhot kamjooh ka seiñ kamjooh ya ki paidbah kiwa pynyoo che wa ymkwah ki u kreh neibynta ka jaitbru tangwa kwah ki du wow pynyoo yei bor yong ki” da ong ka KSU.
Hadien ini wa jia kiwa yahkhmat ka District da e hukum ki wow kem naphang ya ki dkhot ka seiñ North Khasi Hills District Unit heiwa da chah kem leh boon ngut ki dkhot hadooh katni.
Da ong wa ki pulit dalai kynreh ki ya ki yung ki sem yong ki dkhot ka seiñ heipor chiteiñ synyaw wei da em kiwa wan dei riam paidbah iwa da pyntieñ ya kiwa chong chnong khamtam ki kynthai khynnah.
Ka seiñ da ong ko leh wa i leh ki bor ka District da ktah ko leh yei bor kiwa pathai khubor deiwa maham wei pyntieñ ya ki ha kiwa boon rukom wei da man i lakam i synchaar deibor namo wa tip leh kam ka synchaar Dictatorship.
Ki bor district chooh chooh da leh bor ym du ya ki dkhot kai seiñ kamjooh leh da leh ki yei jooh ya kiwa thoh hubor wa ki muktiar wa kiwa ha yung ha sem ki dkhot ka seiñ.
Hanlada ki bor ka aiñ pyntieñ pynsmiej ki ya kiwa hayung hasem yong ki dkhot tangwa ka seiñ da ong ko wa iwa da leh kini ki dkhot ym man i iwa sepia neibhah wa biang ka yurim wa yieñ ka seiñ hei yatoh wa ini i leh ka sorkar wei sam ebor pathan ko ya ki wow yieñ yaleh ki pyrchah yeini waroh da ong ka seiñ.
Kani toh katkam ka khubor na u Donald V. Thabah, General Secretary ka Khasi Students’ Union.
Discussion about this post