Jowai: Ynne i step heipor kamwa 2:00 waje da em i jia wa sñiawsih ha chnong Mustem,West Jaiñtia Hills heiwa da chah bom uwi u manpa hadooh wa yap u.
Uni u manpa uwa tip kam u Bharat Gurung (50 snem) uwa chong wa sah ha Chahtngit-Treriatpamblah da dooh u yei mynsien yong oo hadien wa chah dat chah bom u.
Ha kani ka step heipor kamwa 2:00 waje u Bharat da lai u cha yung ka kurim wa rim u kawa tip kam ka Chemti Dkhar (40 snem) heiwa da pynawri awra u wei da pynjæd tympra u ya ki jhoor wa thung ha kani ka yung.
Hadien ini ki khon ka Chemti kiwa kynthup ya u Nangieit Dkhar (20 snem) wa u Kolbi Dkhar (18 snem), kamjooh u diah ko ya uwa tip kam u Skhemlang Dkhar da mih ki wow pynyasuk tangwa dang joor i awri hadooh wa da mih ki paidbah na jan yung.
Ki paidbah da patah ki oo hadooh wa poi harood ka wah Mustem heiwa da bom ki oo hadooh wa khlaad u.
Da pyntip wa u Bharat ym em de yachong u wa ka Chemti kattu la chi snem chiteiñ wei da wan pynawri u ya ki ha yung dei langær.
Neiliang u Waheh Chnong ka mustem da pyntip u cha ki pulit kiwa da wan wut wut cha kani ka thaw wei da kem ki ya ki le ngut kiwa kynthup ya u Nangieit, u Kolbi wa u Skhemlang wei da pynkit ya i metyap u Bharat cha Civil Hospital yow leh yeiwa emkaam.
Discussion about this post