Jowai: Ka yungkrehkaam ka West Jaiñtia District Election Officer ynne ka sngi da sdang ki ya ka Special Drive Campaign kawa mut wow thooh ya ki khynroo khyllood wa em hei rta wa 18 hadooh 21 snem wei ki wympu em pyrtuid hapoh ka Electoral Roll.
Ya kani da pynman ha Thomas Jones Synod College, heiwa da emlang u S.C. Laloo, ADC wa u B.J. Kharshandi EAC.
U S.C Laloo, hei klam yong oo da khut u ya waroh kiwa da dap 18 snem wow wan ki cha khmat neibhah i hok thap vote toh i yong ki wei ka EPIC leh yarap ko wow man kam ka ID wa ye ki u pynemkaam.
U B.J. Kharshandi won da ong u wa kani ka Special Drive Campaign u neh ko waroh u Naiynñiaw nadooh ka 1tarik hadooh ka 30 tarik wei da yabahah leh ya kani ka Special Driven sa ha kawi ka bynta ka wow sdang nadooh ka 8 hadooh 22 Naiynñiaw ha ki Polling Station heiwa yei pyrtuid kiwa da khlaad u pyndam noh ki, u pynbait yei bakla thoh yei pyrtuid, kiwa kyrriah chnong wei yeni ki paidbah ye u pyndep ha kini ki sngi.
Da ong u leh wa ini i leh ymtoh du ya kiwa puræ puthi wei daw pynpsiah pyrtuid leh ya kiwa da biang rta ki wym em lai skur kiwa sah cha palatchnong.
Ya kani ka Special Drive daw pynman leh ha kiwi ki skur wa em ha Jowai heiwa ha ka 20 u Naiynñiaw u pynman ha Government Boys wa Government Girl HSS, ha ka 21 tarik won ha St. Mary Mazarrello wa Marian Hill HSS, ha ka 24 tarik won ha KJP Synod wa North Liberty HSS, ha ka 25 tarik won ha Seiñ Raij School katwa ha ka 26 tarik won ha Kiang Nangbah Government College. Daw pynman leh ya kini ki jooh ha Jowai Polytechnic wa ITI Jowai.
U Dr. R.R Kharkongor, Principal ka college hei klam yong oo da ong u wa i bor wow jied ya kiwa mihkhmat toh iwa khlan bha kamtæ emkaam u pynpsiah pyrtuid wei wow pynemkaam yei hok ya ka Vote.
Ha kani ka sngi da pynman leh ya artylli ki yalehke Basketball hapyrdi kiwa da em pyrtuid ha ka Electoral Roll wa ki wympu em pyrtuid ha ka.
Discussion about this post