Jowai: Ka Seng Samla Unitarian Union North East India hei yakrehlang waka Seng Samla Unitarian Mukhap da pynman ki ya ka thung dieñ ynne ka 8 tarik hei emlang u Secretary yong ka chnong Mukhap u T. Papang kam u kongsan.
Ha chwa wow thung ya ki dieñ da pynman ya ka yalang wa tbian ha yungskur u Rev. David Edward Lapasam heiwa emlang ki khynroo khyllood ki kattu katni tylli ki balang wa marjan kam ka Balang Jowai, Nongtalang, Khyndewso, Kharang deilang wa ki manbei ka Balang Mukhap.
Kam u kongsan, u Teibor Papang da yaroh u ya ka Balang Unitarian kawa da chimkhia wow pynman ya kani ka thung dieñ wa nyngkong ha ka chnong Mukhap. Da ong u leh wa kiwa wan ke cha ka chnong ye ki u ong wa dang boon ki dieñ tangwa ym ye u len wa ki khloo wa em ha chnong da stang ki, iwa sñiawsih toh wa ym em wa yaleh wow thung salan ya kini ki dieñ wa da dep pam.
Da kyntu u leh ya ki ya ki khynroo khyllood ka Balang Unitarian Mukhap yow yahkhmat ki wow wanrah ya i kylla hei yatoh wow wanrah ya i khooid i jngiar wei wow pynmih biang ya i yirngam ha ka chnong ka thaw.
Ha kani ka sngi da thung ya ki dieñ ha pchem ka yung mane ka Balang Unitarian, Mukhap kamjooh leh ha ki thaw ka chnong thymme yong ka Mukhap wow yada ya ki tyllong um yong ka chnong.
U Wympher Suchiang da ong wa ya ki tre dieñ wa thung da thied naka nursery yong ka chnong Mulieh wei ki dieñ toh kiwa mih hi na kani ka thaiñ kamjooh wa ki tre dieñ soh.
Discussion about this post