Jowai : Ki nongyalam yong ka Jaintia National Council (EJNC & WJNC) wa ka Hynniewtrep Achik National Movement (HANM) – Jaintia Hills Unit haka yalang wada pynman haka 16 Khonchonglad 2015 ha Ophis ka EJNC-CC dei wi i sur da rai ki wa daw rah lama yong ki ka wow sdang nadooh na State Central Library (Shillong) chadooh cha Secretariat haka 30 tarik yong uni u bnai.
Ha chwa i rah lama yong daw em leh i yalang tbian ha pchem ka State Central Library(Shillong) hei por 11.30 i step. Ya kani ka rai ki 2 seiñ da chim hadien wa pynslem ka sorkar jylla wow pynbna paidbah yaka kaiphod takit yei chahsiat yap ki arngut ki bru paidbah haki pulit iwa da jia haka 24 Naikhynde 2014 ha Mookhep.
“Ym ye de i u chong kli kti hei yatoh wa ini i leh ka sorkar wa ki pulit wow murieh ya kiwa emkti hei wow siat yap ya ki arngut ki mynsien” da ong u President ka HANM-JHDU u ma Shaniahlang Suchen.
“Kam ki seiñbhalang kiwa yieñ skem wow yaleh nei bynta ka Ri wa ka jaitbru ym yohsa de i khlem hiar madan wow yaleh yei hok ka kong Setlang Phawa, wow ma Direstmon Siangshai, kiwa da chah tynyap ha ki pulit” da ong u Chairman ka JNC u khynroo Sambormi Lyngdoh.
Discussion about this post