Jowai: Ka Thomas Jones Synod College Jowai ha kani ka 27 tarik da leh burom ko daka Graduation Day næ ka sngi yong kitu ki khynroo khylood wada pyndep yaka Degree, heijooh ipor leh da e khusnam ya kitu ki khynroo khyllood wada leh bha haka exam HSSLC waka degree.
Ha kani ka yalang leh burom da pyllai da ka Collin Bapui Assistant Professor English Department heiwa ka Isawanda Laloo IAS, Sub-Divisional Officer Civil Amlarem da man ko kam ka kongsan, u Rev G.S Lytan Administrative Secretary Presbyterian Church of India Shillong kam u symbood kongsan nalor kiwi ki sahep wa kiwi kiwi.
Da yoh i puræ Bible wei duwai naka Emidaka Phyllei, i rwai pdiang naki khynroo wa puræ 3rd Semester, i klam naka Cheloshmon Khonglah kawi naki Graduating Student.
Ka College da chim ko leh ka bynta u e khusnam ya u Omega Lalropuia Poi uwa da poi chakhmat haka exam HSSLC, neitæ kiwa da poi chakhmat haka degree wa kynthup yaka Justina Sumer wa ka Lanagrazia Talang, heijooh ipor da e khusnam ki leh yaka Dr. Bhalang Sungoh ka khyllood wa nongkong napoh Thomas Jone wa pyndep yaka PHD haka subject Education.
Neitæ da pynkup burom leh ya arngut ki khynnah wa mihkhmat bha yaka college wa kynthup ya u Barrister Bang waka Riakordor Langshiang.
Ka kongsan, Isawanda Laloo hawa e i klam ha kani ka sngi da e mynsien ko ya waroh ki khynroo khyllood wada pyndep yaka Degree, wei da ong ko kani toh ka por u sdang thymme yei rta u thooh ki laad ki luti wei u chynna che iyi wa kwah ki u leh chakhmat, la hei yatoh u pteiñ chooh chooh i puræ wa rap chajrong, u sdang thooh khih thooh kreh, u yieñ hei yong ki da hi ki kjat yow kyrchaan pyn ya i hi wa kiwi kiwi.
Chooh chooh ong ko ipor wa dang puræ haki skur ki College toh i por wa sñiawsuk tam neibhah toh i por wa yoh i u yimphoo ya ka mynried wei u jied yaka luti wow lai chakhmat.
U symbood kongsan Rev G.S Lytan hawa e i klam da kyntu u ya kiwa da pyndep Degree hanla em hapyrdi kiwa kreh chitom wa ki wym em kreh chitom leh u lai ki chakhmat yow pyndep yei wa mut wa thmu, heijooh i por leh kyntu u wow leh iyi iyi neibynta ka imlang sahlang.
Da ong u leh wa emkaam u kylli phi ya phi, yi kwah phi u leh hadien ini? Wei yi mut phi u leh? E wa i jubab yong phi u pynhun ki yaphi hadien.
Da yoh leh i klam na u President Alumni Association Rev. L. Garot, u Principal ka College Dr. R.R. Kharkongor wa kiwi.
Da pynchong chit chooh chooh dei chaad tynre, i rwai kyrpang na u Eladmitre wa kiwi.
Discussion about this post