Ha kini ki tayaw wa dadep da mih boon bha i ood ki paidbah ka sor Shillong wa joor i sahkut ki kari khamtam cha ki thaiñ Mawiong heiwa da sah ki kari da ki kynta khamtam ha ki sngi wa kut ka tayaw.
Iwi na ki daw wa toh wa ha ki chiphaw snem ki wa wan uiñke suwari da ku ki ar chah wei ki daw wa wanrah ya ini ye u man wa ka jylla da chong suk chong saiñ ko wa i joor wa pawnaam ka jylla lynga ki Social Media khamtam ki dur wa chon ki bru wa miat ki loom ki wah ha kylleiñ.
Katkam wa kheiñ ka tnat Tourism da ong wa ha u snem 2006 da em kamwa 4.04 Lak ngut kiwa uiñke suwari kiwa napoh ka ri kamjooh kiwa na baar ri. Ynnin u snem da ku ko cha 8.93 Lak ngut.
Kiwa wan na baar ri da ku i na 4000 ngut cha ka 85,000 ngut hadooh u Kmaichonglad (December) ynnin u snem.
Neiliang ka sorkar jylla leh da pyrchang ko u chna ya kiwa boon ki thaw sah kiwa uiñke suwari ha ki thaw wa ka-it ki paidbah u lai wei ki bru samen da sdang ki ya kiwa boon kam kini ki thaw sah.
Ki bru wa chemphang da ong ki wa hapoh ka jylla hi, ki thaw toh kiwa da chna da ka Bei Rymaw wei lada ym ye u pyrkhat kammon u yada ya ki heithaw wow yoh nong du katwon snem donhi da jæd daw pra ki khamtam ki yingkieñ dieñjri hadooh ki khloo kyntang.
Da ong leh wa emkaam ya kiwa wan uiñke suwari kiwa em ka kitkhlieh wei haap thooh laad leh wa kammon u leh yow yoh ya kam kini ki jait.
Kiwa dai dukan hadooh kiwa kamai kari da ong ki wa boon hi kiwa wan cha poh jylla da song baam chwa ki wei man ko kawa dooh nong ya ki paidbah wei kamjooh da em kiwa pyntaroi ya kiwa boon ki thaw.
Kamtæ ka kaam uiñke suwari ye ko u man kam ka kyrkhu kamjooh ka tim ha ka jooh ka por lada ym ye u pynkhreh ya ki kyndon wa biang.
Discussion about this post