Chimkhia ka PAC hei yatoh wa ka KNGC deiwa phah hajir ya ki sahep ka Sorkar

Shillong: Ka Public Accounts Committee (PAC) yong ka yung dorbar chna aiñ ka jylla ynne ka sngi da khut hajir ko ya ki sahep ka tnat puræ puthi ka jylla hajrong wa sangeh i pynkreh yei chna ya ka Hostel chynrang ha Kiang Nangbah Government College, Jowai deilang wa kiwi kiwi de i duna wa ka College yachem ko.

U Chairman ka PAC, u Paul Lyngdoh hawa yaklam wa kiwa pathai khubor da pyntip u wa ha kani ka yalang da mihkhmat da u Secretary ka tnat puræ puthi u WR Lyngdoh wa u heh Engineer ka tnat PWD Building.

Katkam wa ong u Paul, i sangeh u Contractor wow chna ya ka Hostel chynrang toh wa ym em pyllait ya ka poisa hadien wa da dep u chna ya ka kamwa 60 percent. Hajrong ini ka PAC da phah ko ya ka tnat puræ puthi wow pyllait noh ya kani ka poisa khnang wa u ye u Contractor wow pyndep noh yei chna wa dang sah heipor wa biang.

Da pyntip u leh wa ya katai ka Hostel ka mang poisa toh T. 1.2 Klur wei ka PAC leh da phah ko ya ka tnat puræ puthi leh u pynkreh ko chaaid chaaid neibynta wow chna pynheh ya ka College kawa da mang T. 2 Klur na ka scheme Rashtriya Uchchatar Shiksha Abhiyan (RUSA).

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

Ka PAC leh da paan jubab ko na u Secretary ka tnat puræ puthi hajrong wym yoh tulop kattu la 11 bnai kiwa siaki wa kiwa kreh ha ka College.

U Paul da ong u wa em 26 ngut kiwa sikai (Lecturer) wa 9 ngut ki wa kreh kiwa kreh hapoh ka Contractual Basis. Kini kiwa sikai toh kiwa hikai ha ka Morning Section ka Kiang Nangbah College.

U Chairman ka PAC da ong u wa kini kiwa sikai yoh tulop ki du T. 5,000 donhi chi bnai ka wym yahaap wa ka dor wa booh da ka sorkar wei da phah wow su tulop ya ki T. 15,000 chibnai kawa man ka kyndon wa da booh da ka sorkar.

Neidaw wym yoh tulop kini kiwa sikai ha ka Morning Section 7 ngut na ki da ieh noh ki yei kreh.

Da pyntip leh hadooh katni ym em wa sikai Maths wa English ha kani ka College ha ka kyrdan Higher Secondary neidaw wa chah kyrriah kaam ki kattu la ar bnai iwa da ktah joor ya ki khynnah wa puræ, wei neiliang ka PAC da phah ko wow pynsmat u thung ya kiwa sikai thymme.

Hajrong waroh ini ka PAC da phah ko ya u Secretary ka tnat puræ puthi wow pynbiang ya ka bui (report) kawa bniah hapoh chi bnai cha ka PAC.