Shillong: U Vishal Kumar Verma uwa man kam u National Level Wrestler ka ri India da khlaad u ha ka 8 tarik hadien wa chah riñ light u ha Jaipal Singh Stadium wa em ha Ranchi, Jharkhand.
U Bholanath Singh uwa man kam u General Secretary ka Jharkhand State Wrestling Association (JSWA) ong u wa u Vishal da poi u ha ka kyrdan wa soo ha kani ka Senior National Wrestling Championship wa dang dep pynman.
Da pyntip leh wa i takit ki pulit da chem wa u Vishal da chah riñ light u heipor wa pynemkaam u ya ka Pump um wei da suba wa ym biang i leh wiring kamtæ da chah riñ light u wei kani ka Stadium man ko kawa da dap um chwa neidaw wa joor u slap.
Kani ka Stadium toh kawa chna nadooh u snem 1978 wei man ko kawa da sih bha wei da sdang pynchna biang ka. Ka JSWA ka leh em ophis ko hapoh ka Stadium wei u Vishal jooh wan wai u ya kani ka ophis hei step wei da suba wa chlai um kani ka ophis da pynemkaam u da ka Pump yow taan ya ka um heitæ da chah riñ light ha kani ka pump.
Discussion about this post