Khliehriat: Ynne ka sngi ka Khasi Student Union (KSU) Lumshnong Unit da pynman ko ya ka ya phyllu yumut hajrong ka phang “I chah ktah na i chongkha khynnah”.
Chwa wow yoh ya i chong pyrkhat ha kani ka sngi, da yoh yei klam maitphang na u President ka KSU Narpuh Circle u Shaphrang Pynkhlong, hei emlang u Asst. Waheh Chnong ka Lumshnong u S. Shylla kamjooh wa kiwa sikai deilang wa ki khynnah skur.
Kiwa klam ha kani ka sngi toh ka NG. Lyngdoh (Ladies Supervisor) wa ka T. Bhoi (Ladies Supervisor) naka Khliehriat ICDS Project Lad Sutnga, East Jaiñtia Hills District.
Ha chwa u yoh yei klam hajrong ka phang “Ka ktah na i chong kha khynnah” da e nongmuna deiwa kylli, ki symbe jhoor kiwa kammon u jied i yow booh u symbe? Ka jubab wa yoh toh kiwa bha wei kiwa da heh.
Ha ini i klam yong ki da pynche ki chaphang i eh wa mih na i yoh kurim dang khian rta næ dang khynnah deiwa ong lada yoh kurim hei rta wa dang khian ktah ko yei chait i khiah, i pyrkhat pyrdaiñ teiñ teiñ poi u pood hadooh wow tynyap ya ki khon hapoh kpoh neidaw wa sñiawthooh wa ympu ye u pyndap pynbiang yeiwa emkaam i khon.
Boonsien katwa dang man khynnah dang khian i rta i baam wa baam ka bei dang toh u kynrong yei doh i pran yong ka kamtæ duna i yoh baam i khonboo hei por dang pun ini pynman ko boonsien manda kha i khonboo man i wym biang baam wei ym miat leh i chait i khiah.
Chooh chooh hei yatoh wei chongkha dang khian da ong wa kam ki khynnah skur toh u emkaam u yaleh ki wow pyrkhat chwa ya ka mynried kawa daw wan wa kawa kammon ka mynried u kwah ki kawa bha wei tyrchaiñ næ kawa doom wei dap du i sih i roi.
I ong ka sorkar wow chong kurim hapoh 18 snem ki kynthai wei 21 snem ki chynrang man don hi ka dak wow yada hi-eh naka tynde ka juk “SATI” ki Hindu. Tangwa katni won emkaam u yoh chwa i yei stat i tip, i bor pyrkhat wa khlan wa i yoh i kot i wa biang. Khlem kini ym ye i u ong wa da pura i man bru neibhah ha kini ki sngi kiwa eh wei kyllaiñ emkaam yei stat wa pura wa i pyrkhat pyrdaiñ wa yoo jngai wei manda biang ini hei tæ u sdang i u pyrkhat ya ka manyung wa kammon u tei i ka.
Haka Bible leh khana che ko wa ka chongkha chongman man ki iwa kyntang. Da kyntu leh ya ki khynnah wow man ki ki khynnah kiwa stat kiwa ye u pyndep ya ki kyrdan waphær waphær yow ye ki leh u yarap wow kyntu ya ka imlang sahlang u man ki nongmuna kiwa daw bood kiwi ya ki luti wa yah ki ha ka imlang sahlang.
Katni ki sngi boon bha ki bru kiwa tynyap pyn daki ya ki neibhah poikha ki khlem pynkhreh, kamtæ kani man ko kam i sneiñ yaki khynnah wow minot wei wow mylliñ yei kaam khynroo kat hadooh wa da toh i por wa biang.
Ha kani ka yalang da yoh myntoi kam wa chispah tam ki khynnah skur.
Discussion about this post