Jowai: Ka Jaiñtia National People Organisation JNPO ynnin ka 15 tarik da leh warom sah kynmoo ko yei dap 71 snem i yoh laitlooid yong ka Ri deiwa lai li saam baam ko kam u khoo, i phniang baam, salah wa kiwi cha ki khynnah khonswet wa ka Northeast India Mission Association (NEIMA) Orphanage Home ha Sahsniang, West Jaiñtia Hills District.
Ha kani ka sngi da yahkhmat da u president ka seiñ, u Andres Suchiang uwa da pyllai leh ya ka yalang ha chwa wow e ya kini ki tiar katwa u Wanshwa Nongtdu, President ka Amm Admi Party (APP) da man u kam u kongsan uwa da pynhær ya ka lama ka ri hei emlang leh u Chadame Sungoh, General Secretary All Hynniewtrep People United Front (AHPUF), u Sunny Bareh, Vice President Indigenous Bio-Diversity Social Welfare Organisation (IBSWO), Rev. Early Morning, C.H Passah Secretary NEIMA, u Ronas Rabon, Waheh Chnong, u First Born Kamar, Secretary Chnong wa kiwi kiwi.
Kani ka thaw ri khonswet kamwa man katni da ri da sumaar ko hadooh 28 ngut ki khynnah 16 ngut toh ki khynthai wa 12 ngut ki chynrang, wei wa katni kani ka thaw ri khonswet da ye ko u pynsah jar jiar i yung hapyrdi ki khynthai wa ki chynrang.
Ki wa ri wa sumaar ya ki khynnah toh ka Darihun Lyngdoh kawa man ka House Mother deilang wa ka Shitmon Biam wa ka Tympang Shylla, katwa u Farewell Star Warlangpih toh u House Father uwa pait wa yoo ya ki khynnah chynrang.
U Nongtdu kam u kongsan ha kani ka sngi da ong u wa dap u dei sñiawngooh ya ka NEIMA kawa da booh ya kani ka thaw neibynta ki khynnah khian kiwa da dooh ya ki bei ki pa kamjooh kitu kiwa cha lehbeiñ ha ki bei ki pa yong ki hi.
Neiliang yong u Nongtdu da kular u leh wow e hadooh 100 churia i kyndawbilat neibynta wow tei yeiwa emkaam ha kani ka thaw.
U Chandame hawa klam da kyntu u ya ki khynnah dei wa ong wa ymhoi u dooh mynsien ki, toh u man kiwa minot hei puræ puthi u man ki leh kiwa ngait sneiñ wei wow kynmoo ki ya u Blai hanlada em ki ha kwon kawon ka niam.
Da pynyoo suk chooh chooh ya kani ka sngi dei rwai na ki khynnah wa em kani ka thaw.
Discussion about this post