Jowai: Ka National Green Tribunal (NGT) da chong bichaar biang ko ya ka mutkotduma u Sajay Laloo wow yada ya ka wah Myntdu ha kani ka 4 tarik uni u bnai.
Neiliang ki muktiar u Laloo da pyntip ki cha ka NGT yei wym em pynkrehkaam ki tnat sorkar ya ki hukum yong ka wei da e laad wow jubab yeiwa jubab neiliang ka sorkar hei yatoh wa kani ka mukotduma.
Ha ka hukum wa pynmih ka NGT da kylli ya ka sorkar wa ya ka Jowai Municipal Board wa dadep chna ki namo ympu em ya ki Common Sewage Treatment Plant ki wow pynemkaam yow pynkhooid ya ka um wa tngit wa mih na waroh ki yung ha Jowai chwa wow kai won ki cha ka wah Myntdu kamjooh leh da kylli wa da dep namo ympu em dep u chna ya Sewage Network heiwa ya ki dooid ki liar u pynkai ya ki jakhlai du ha kawi donhi ka thaw pynkhooid.
U Laloo da ong u wa da yooluti wa lyngba ka NGT daw wanrah ko yeini waroh wei daw pynman ko ya ka chnong Jowai kam ka chnong wa nyngkong hapoh ka jylla wa em ya ka Sewage Network.
Ka NGT leh da ong ko wa ym hoi u dam u chna ya kini waroh wei wow chimbor ki na kiwa toh u chimbor wow leh ya ini kam na ka JHADC, ki waheh chnong wa kiwi kiwi wei wow pyntip biang ki cha ka NGT yeiwa da dep leh ki manda chong bichaar biang sa chisien.
Neiliang ka Jowai Municipal Board hei yatoh wa i chna yung harood ka wah Myntdu da ong ko wa ini toh i kaam yong ka JHADC ymtoh yong ka sorkar jylla tangwa da yania neiliang ki muktiar u Laloo wa ini toh iwa bakla neibhah ka Jowai haap ko hapoh Urban Development Department (Town Planner Division) lait noh ki 4 tylli ki dong wa em ha Jowai. Yow yohbor u chna yung waroh haap lai ki lyngba ka Urban Development hadooh wow yoh bor u pyndait um wei wow riñ bordiñ.
Da pynbaad leh wa ka Jowai Municipal Board da leh chilliang ko heiwa 40% ki thaw sait kari dang wai hi ki khlem pynkhreh ki ya iwon iwon wow pynkhooid ya ka um tngit wa mih naki deiwa booh da ki Effluent Treatment Plant.
I jhep i jakhlia wa mih na ki wa chongdai ha Iawmusiang, ka yaaw Seiñraij, ka yaaw ka Balang Presbyterian, CNI wa ka yaaw thymme wa em ha Ladthadlaboh da pyntip cha ka NGT wow pynmih hukum ko yow leh ya iwa emkaam neibhah i jhep wa mih na ki da pyntngit ko ya ka chnong Jowai.
Neiliang ka Central Pollution Control Board (CPCB) won da ong ki wa da dep wanrah ki ya ini hakhmat ka Jowai Municipal Board tangwa ka Municipal da jubab ki wa i kaam yong ki toh du wow lai kit jhep donhi.
Ka CPCB da chem ko leh em boon kiwa noh khyndaw cha ka wah Myntu kiwa mih leh na i chna sarok ka PWD kamjooh heipor wa chna pynmiat ya ka Lynter wa ka Syntu Ksiar da ka tnat Soil and Water Conservation.
Da phah leh ya ka Jaiñtia Fishing and Environment Protection Association wow booddien ya kiwa leh ya kini ki jait kaam wei wow pynbiang ki ya ki Video wa ki dur yow pynmih ha khmat ka NGT manda chong bichaar biang sa chisien.
Discussion about this post