Shillong: U Secretary General yong ka Catholic Bishops’ Conference of India, u Bishop Theodore Mascarenhas, SFX, ha ka chithi paidbah (open letter) cha u Montri Rangbahdooh yong ka Ri India u Narendra Modi, da kyntu u ya oo wow leh u iyi iyi katkam i bor yong oo wow pyndooh yei mynsien ya sih para bru wa da yalap u Montri Rangbah ka jylla Jharkhand.
Ha katai ka chithi paidbah wa em ka tarik 13 Naisaphra da phah leh cha ki 172 tylli ki Diocese næ jylla niam ka Balang Catholic ha ri India. U Bishop Mascarenhas da ong u wa waroh chi kattu da yait u wow klam chaphang i jia ha ka jylla, tangwa katni won dei sñiaw khia mynsien yeiwa jia ha katai ka jylla ym yohsa de u khlem thoh ya kani ka chithi cha u Narendra Modi.
Da ong u wa ki kyntien “Sabh ka sat, sabh ka vikas” næ waroh u yakrehlang wow yoh yei roi i paar iwa u Modi pynbna paidbah u heipor yalap Election u ym em slem ha Jharkhand kawa da wai laad ya u Raghubar Das wow man u kam Montri Rangbah katai ka jylla.
U Bishop Theodore da ong u wa u Montri Rangbah ka Jharkhand da sdang u ya ka “Agenda” wow sdang u pynmih ya ka mynsien pyrchah ya ki Christan deiwa pynmih khubor u man ka sngi chaphang ini wei nachwa kiwi ki bru waroh wa em ha kiwi ki niam nadooh ki khian paaid da im suk wei burom ki kawi ya kawi.
U Bishop da ong u leh wa ha ki khubor da pynbaad ki ya ki Missionary Christan wa ki pynkylla niam ki ya ki Dalit wa kiwi ki khian paaid wa dang sahdien kiwa khut kam ki “Vanvasi” (brukhloo) i kyntien kiwa u Mahatma Gandhi ym jooh pynemkaam u ki hawa klam chaphang ki bru na ri-loom.
Kini toh ki kyntien wa thok wa chukor heiwa ya kiwa khian paaid da pynyoo paidbah ya ki kam kiwa lui lui kiwa chah yah luti bakla ha ki Christan.
Kamtæ hei yatoh wa ini i chah pynbaad ka Balang Catholic wa pynkylla niam yabor, u Bishop Mascarenhas da ong biang u ha ka chithi cha u Modi wa ka Balang hi pyrchah ko yei kylla niam yabor. Wei heijooh i por leh yieñ ko hajrong i hok wow yalap ya jar jiar ka niam katkam ka Article 25 – 28 yong ka Constitution.
Discussion about this post