Chah kem 12 ngut ki manbei na Pynthor wa dat wa bom wei khi lenooid ya ki 3 ngut ki kynthai

Shillong: Hadien wa yoh ujor na ki 3 ngut ki kynthai wei na ka Civil Society Women’s Organisation (CSWO), ynne ka sngi ki pulit da kem ki ya 12 ngut ki manbei ka Seng Kynthei Pynthor neidaw wa chah pynbaad ki wa emkti ki hei wow khi sñiooh le nooid wei wow choh wow dat ya kini ki kynthai khyllood.

Katkam wa yaklam wa u Rangbah Shnong u Batskhem Sten da pyntip u wa 8 ngut ki manbei da chah kem ki ha ki pulit ka Sardar Police Station wei 4 ngut da chah rah ki ha ki pulit ka Pasteur Beat House.

Kin ki manbei da chah kem ki hadien wa chah khut hajir ki ha ka Chairperson yong ka Meghalaya State Commission for Women hei yatoh wa i jia ha ka 14 tarik uni u bnai.

Neiliang u Rangbah Shnong ka Pynthor, u Batskhem Sten hawa batai u yeiwa jia ha katai ka miet 14 tarik, da ong u wa ki ar ngut ki kynthai wa sneiñ ka Seng Longkmie wa ka chnong Pynthor ym toh ka sien nyngkong wa chem ya ki wei dadep maham leh ya ki wa ymhoi u leh ki ya ki kaam pyrchah ka imlang sahlang.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

U Sten da ong u wa ha ka 12 tarik heipor 12:30 pyrdi synyaw, ka seiñ manbei da yoh ki u ksoh ya ar ngut na kini ki kynthai (wa da murieh pyrtuid) kiwa dang kamwa 21 snem i rta ki wym toh leh na ka chnong wei ha ka sngi wa bood da wan ki wa u Counsellor ka Seng Lamjingshai wei da poi cha ka sñiawthooh wa ka chnong wa toh u kiar noh kini ki myllien wa sih yong ki.

Tangwa ha ka 14 tarik heipor 1:30 i step, ka seiñ manbei da yoh kem biang ki ya ki jooh ki kynthai deilang wa ki le ngut ki chynrang kiwa nabaar chnong kiwa wan da ka wi ka kari.

U Rangbah Shnong da ong u leh wa ki da pyntip ki cha ki pulit ka Pasteur Police Beat House, tangwa ym ye ki u poi smat wa ym em pulit kynthai wei dapoi ki hadooh 5 waje i step.

U Rangbah Shnong da pdiang u leh yei bakla ki manbei tangwa ki da leh ki wow yada ya ka chnong wa ka imlang sahlang.

Da ong u leh wa ka chnong smat ko wow su yei lutsan wow sumaar ya kini ki kynthai kiwa chah dat ha ka seiñ ki manbei.

Ha iwi tawon i liang, ka Chairperson yong ka MSCW, ka Theilin Phanbuh da ong ko wa ka Commission da khut ko ya ki 3 ngut ki kynthai wa ki dkhot ka Seng Longkmie Pynthor wow ap wei wow bichaar yeiwa jia.

Ka Theilin da pyntip ko wa ar ngut ki kynthai ki wym ye u wan neidaw wa chitom ki wei da wan du kawi donhi katwa neiliang ki dkhot ka Seng Longkmie ki da pynche ki hakhmat ka Commission.