Yow pynsakhiat yei rukom jied kyrtong daw pynemkaam noh ka ECI da ka VVPAT ha ka Election 2018

Jowai: Ha kani ka Election wa daw wan da pyntip wa ka Election Commission of India (ECI) daw pynemkaam ki ya ki kor wa tip kam ki Voter Verifiable Paper Audit Trial (VVPAT) yow pyntikna wa ki kor EVM ym em jied bakla ki ya ki kyrtong heipor wa thap Vote ki paidbah.

Ka ECI da chim ko ya kani ka rai hadien wa boon ki seiñ siañ hima da ujor ki wa ym chaniah ki ya ki kor EVM neibhah ymye u pynsakhiat wa ki Vote man ki kiwa tikna wei ye leh ki bru u pynkylla yeiwa da em ha ki.

I rukom krehkaam kini ki VVPAT toh deiwa pyndait ya ki deilang wa ki kor EVM wei hadien wa chon ki paidbah ha u kyrtong wa jied ki daw mih i pyrtuid u kyrtong wa ka chaap ha ka kor VVPAT wei daw neh i kamwa 7 second wei ya ini daw chon (print) ka kor VVPAT ya ki wei daw ah ko ki wei daw pyllang ya ki ha ka synduk ka VVPAT.

Ya ka kor VVPAT daw booh hapoh ka synduk kawa em yit yow ye ki paidbah u chynna yeiwa pynyoo kani ka kor VVPAT. Ya kini ki kor ye u wai u khang ya ki da ki Polling Officer donhi.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Hanlada kattæ leh ka ECI da kam ko wa ki kor EVM ymtoh wa ye ki bru u pynkylla ya ki Vote wa da em ha ki. Tangwa hadien wa em wa e mukotduma pyrchah ya ki EVM ha ka Supreme Court wa ym em chaniah ki ya ki, da pynmih ya ka hukum wow pynemkaam noh da kini ki VVPAT yow man sakhiat ka Election wa khooid.

Chooh chooh da em leh kiwa kwah wa lada mih i kajia yei wym biang ki Vote wa mih na ki kor EVM ye won u niaw da ki kot wa print kini ki kor VVPAT.

Em won leh kiwa khuslai wa daw tip ki bru yei yi thap Vote ki kamjooh leh daw pynslem ko ya ka thap Vote boi ym ye u pyndep heipor wa da booh heiwa daw em kiwa ye u dooh u thap Vote.