Jowai: Chibynta i lehkmen ya ka sngikha yong u Mahatma Gandhi, ka Dorbar Chnong Ratacherra deilang wa ki dkhot ka Border Security Force (BSF) 19Bn da pynkhooid ki ya ki rood ki kiar ka chnong Ratacherra kawa haap hapoh ka East Jaiñtia Hills District.
Chwa wow sdang pynkhooid da em ka yalang pynsñiawthooh hajrong i emkaam wow man kiwa lehkhooid ha ka chnong ka thaw.
Ya kani ka yalang da pyllai da u Khamsngur Pohiing uwa man leh u Waheh Chnong, uwa da pynkynmoo wa kani da leh kam chibynta ka Swachh Bharat wow pynkhooid ha kani ka 2 tarik.
“Waroh tip i chaphang i lehkhooid, i pynkhooid yaki yung ki sem yong i tangwa dei langer mylliñ i wow pynkhooid cha baar kamjooh ki soodong sookun” da ong u Pohiing.
U Chairman ka chnong u Woltos Pohleng hawa klam da ban joor u wow kyntu ya kiwa chong chnong wow man kiwa lehkhooid khnang wow yoh yei doh i pran wa chait wa khiah.
U Commander ka 19Bn u Sandeep Singh hawa klam da e khublei u ya ka Dorbar Chnong kawa da elaad ya ki chipai ka BSF emlang ha kani ka sngi wa kyrpang ka ri wow pynkhooid ya ka chnong ka thaw. Da kyntu u leh ya ki paidbah wym hoi u lai paikhana ki kat chawa yoh neibhah ini wanrah i yei kjut wa ha rukom.
Hadien wa kut kani ka yalang ki paidbah ka chnong chynrang wa kynthai da mih ki wow pynkhooid ya ka chnong.
Discussion about this post