Jowai: U Ferdinand Suchiang uwa na Dongmihsngi, Jowai ha uni u bnai wa da dep da jop u ha ka lympung National Jeet Kune Do Championship wa da pynman ha Kolkatta, West Bengal deiwa yoh u ya ka takma ksiar ha ka kyrdan 55 Kg Full Contact, neini da chah jied won u wow mihkhmat ya ka ri ha ka 2nd International Hong Kong Martial Arts Meet 2017 wa pynman ha Hong Kong, China ha ka 30 Naikhynde wa ka 1 Naichiphaw.
Ha kani ka lympung u Ferdinand da jop biang u ya ka takma ksiar ha ka Mens 57 Kg Full Contact Category deiwa pynrem u ya uwa mih khmat ka ri Philippines.
U Ferdinand toh uwa kreh kam u Bands Man hapoh ka Meghalaya Civil Defence & Home Guards, Central Training Institute, Mawdiangdiang, East Khasi Hills District.
Ha kani ka lympung sa uwi napoh Meghalaya uwa tip kam u Thomas Rongthaluh won da yoh u ya ka takma rupa ha ka kyrdan yakhun Senior Black Belt waka takma tama ha ka kyrdan Wing Chun.
Ynne ka janmiet u Ferdinand da wan u cha Jowai heiwa da pdiang burom ya oo ha Yingkieñ Myntdu da kiwa hayung hasem, ki MDC hapoh i yahkhmat u CEM ka JHADC u Andrew A. Shullai, u Moonlight Pariat, u Lamdibok Sumer, u W. Sungoh wa kiwi kiwi, ki pulit ka JPT hapoh i yahkhmat u Incharge yong ka u D.H. Pde, ki seiñbhalang wa kynthup ya ka JSU wa ka JYF wa ki lok ki jor yong oo.
U Ferdinand uwa 32 snem i rta da chah hikai u ha ki yalehke Martial Arts nadooh u snem 1998 wei da sangeh u chipor wei da pteiñ biang u hadien kattu katni snem, hei hei yaklam wa kiwa pathai khubor da ekhublei u ya u Blai uwa da ebor ya oo wow poi u ha kani ka kyrdan, da e khublei u leh ya kiwa hayung yong oo, kiwa sikai ya oo ha kani ka jait yalehke kiwa kynthup ya u M. Lywait, u Donny Rani wa kiwi kiwi.
“Nga kwah O u pynchlur ya ki khynnah khynroo khyllood wow chimbynta ki ha kam kini ki jait yalehke, khamtam ya ki khynnah kynthai heiwa ha kani ka juk boon ki kaam wa man pyrchah ya ki kamtæ deiwa tip ki u yalehke kam kini daw ye ki u yada pyn daki yaki hi” da ong u Ferdinand.
Da kyntu u leh ya ki khynroo khyllood wow man ki kiwa tista ha iwon iwon i jait yalehke khnang wow ye ki u poi cha ka thong kamjooh leh wow yoh ki yei naam i burom.
Heijooh i por da kyrpaad u ya ka sorkar kamjooh ya kiwa mihkhmat wow man ki kiwa chimkhia wow e i yarap ya ki khynroo khyllood kiwa yaleh ya kini ki jait yalehke neibhah ha uwi pa uwi em jar jiar i sap yong ki iwa ye ki u wanrah yei naam i burom ka ri wa ka jaitbru.
Da ong u leh wa nadooh dang khian u da kwah u wow man kam u Bruce Lee wei jooh mutdur u wa kammon u ye u poi cha ka kyrdan yong oo wei mynnu u poi u cha China namo Hongkong wow yoo ya ki dak ki chin u Bruce Lee, wei ha kani ka kynti da man i iwa sakhiat heiwa da yoh u wow chondur wa u mot yong u Bruce Lee.
Discussion about this post