Tura: Kam chibynta ka Mission Football ka jylla Meghalaya kawa da pynbna paidbah ha ka 22 tarik u Naiynñiaw, ynne ka sngi won u Montri ka Sports and Youth Affairs ka jylla u Zenith M. Sangma da wai u ya ka Football Coaching Clinic ha District Auditorium, Tura kawa da wan sakhi da ki sahep ka tnat Sports & Youth Affairs, ki Coach, kiwa sikai wa ki khynnah skur ka Tura.
Kani ka Coaching Clinic toh wow e sikai ya kiwa kwah u man Coach ki wow pait ya ki Coaching Centre kiwa em 68 tylli hapoh ka jylla heiwa 28 tylli toh em ki ha Garo Hills. Na kini 8 tylli em ki ha West Garo Hills, 8 tylli ha South West Garo Hills, 4 tylli ha South Garo Hills, 4 tylli ha East Garo Hills wa 4 tylli ha North Garo Hills.
I thmu kini ki Coaching Centre toh wow e sikai ya kiwa ka-it ya ka yalehke Football kiwa da booh wow pynjan cha ki chnong wa sah ki yow lait ki u lai mih cha sor wow yoh sikai yalehke Football.
U Zenith Sangma hei klam yong oo da yaroh u ya ka tnat Sports and Youth Affairs wa ye ki u pynman ya kani ki Coaches Clinic wei man ko ka bynta wa emkaam dooh neibhah daw chem yei sap yong ki khynnah nadooh dang khian ki kamtæ ym sepai de i sap yong ki kam nachwa heiwa ym yoh ki ya ka sikai wa biang.
Da ong u leh waka sorkar i thong ko toh wow wanrah ya ki laad ya kiwa em sap u yaleh bol yow man ka Meghalaya kawa khlan bor ha ka yalehke Football kamjooh leh ka laad im ja ya ki.
Ka Director of Sports and Youth Affairs ka Matsiewdor War Nongbri won da pyntip ko wa ha kawi pa kawi ka Coaching Center ki Coach daw e sikai ki ya kamwa 60 hadooh 100 ngut kiwa yalehke heiwa daw yaleh u thooh ya ki khynnah wa nadooh 6-12 snem kiwa em sap ha ka yalehke Football.
Discussion about this post