Jowai: Ki bor pait bor pyllai ka Chiliangraij UPS SSA kam chibynta wow wanrah yei khooid i pliah ki thaw em naam, em parom, ha ka sngi Pyngkat 13 tarik uni u bnai da chimkhia ki wow pynman i pynkhooid pynjngiar ya ka thaw wa em ki Mooknor ha kawi na ki bynta yong ka khloo Langdoh wa em hapoh ha chnong Chiliangraij.
Hei sakhi ya kani ka program da chem wa i chimbynta ki khynnah skur wa ki wa sikai ka Chiliangraij man ko i myntoi wakhroo neibhah hapyrdi i chah tlep ki Mooknor hei khloo wa rben hadien i pynkhooid pynjngiar da yoh u yoo chynna won yei wandur miatdur wei yoo chongbru chongblai i man kyrpang wei mankyntang ka thaw.
Ha kani ka sngi hadien wa dadep i thwat, i pynkhooid, wow pynpsiah chooh chooh hei man i sñiaw ki khynnah ya ka khubor yong i khooid i pliah hei pyllai ka W. Lanong, Asst. Teacher da pynman ya ka Awareness Prokram heiwa da em i klam i batai na ka Salandaka War, Asst. Teacher hei yatoh wa ki bynta yong ka Swachh Bharat Mission kamjooh leh i khana ya ka thong i pynman ya ka Swachhta Hi Seva Program ha kam kani ka thaw em naam em parom yong ka raij ka chnong.
Wow khriñ chooh chooh ya ki khynnah skur ha ka luti yong i tip u kheiñkor wei maya yei khooid i pliah, u S.D.Laloo na DMC-SSA, West Jaiñtia Hills District chim u wow booh u pachat hapyrdi ki khynnah skur wa kiwa sikai chiboon ki kyntien choh jingmut wei da kyrsu kyntu u leh wow yaleh chooh chooh ki u pynjanai yei yakrehlang hajrong ka thong wow wanrah yei khooid i pliah hawaroh ki liang wei u pteiñ leh u kreh yei kaam man ki por man ka sngi khnang wa ka thong yong ka Swachh Bharat Mission u man ko kawa jop wei poi hawa mut wa mang kam wa kdaw luti u Mahatma Gandhi.
Discussion about this post