Jowai: Kiwa pynman ya ka NH7 Weekender ynne ka sngi da yachem ki wa ki 4 tylli ki seiñbhalang kiwa kynthup ya ka HNYF, HYC, HSU wa ka CRJM ha kamra krehkaam u DC ka West Jaiñtia kiwa pyrchah yei dai kiad hapoh ka thaw pynman ya ka NH7 ha Lad Mukhla.
U DC u R. Rapthap hadien wa kut ka yalang da ong u wa kiwa pynman ya kani ka tamasa da ong ki wa u chim khia hi ki ya ini i kaam wei hadien wa dadep pynman ya ka la arseiñ da chemsap ki wow leh ya ini waroh kamjooh leh ka kaam da kiad lai ko chakhmat wei u pyndam ya kiwa da dep pynkhreh man ko kawa eh bha.
Ki seiñ hawa yaklam ki wa kiwa pathai khubor da ong ki wa ym em sñiawhun ki yeiwa mih naka yalang wei dang pyrchah hi ki ya i dai kiad wei ym pyrchah ki yei wan ka NH7 wei kiwa pynman ya kani ka tamasa leh ym ye ki u e i jubab wa biang hapoh ka yi ka kyndon aiñ wa ye ki u dai kiad wei kiyi wow bahkhlieh lada jia iwon iwon wa sñiawsih.
Da paan ki leh da i thoh na u DC wow kular u pynkemkaam da u Alcohol Breath Analyzer Meter ya kiwa yah kari kiwa mih na kani ka thaw wei wym hoi u elaad ya ki u yah kari, neibhah ki paidbah katni da chah pyndaiñ kuna ki kiwa yah kari dei muaid wei ya kiwa yah kari dei muaid ha ki arsngi wa pynman ya ka NH7 leh toh u leh kamjooh.
Da ong ki leh wa kani ka tamasa toh kawa pynman da ka Company kiad kamtæ pynchlur ki ya ki khynroo khyllood wow maad yei kiad hadooh kiwa dang khian neibhah lada ong kiwa pynman ya kani ka tamasa u chah du kiwa 21 snem chaneiñ ym ye ki u pyntikna leh ya ini.
Da pynkut ki deiwa ong wa i kam wa hadooh 1000 ngut ki bru na ka thaiñ Mukhla wow yoh kreh man i leh i wym yoo tikna neibhah ha ka thaw pynman ya kani ka tamasa ki bru wa kreh toh 97% toh ki baar jylla bait.
Discussion about this post