Jowai: U Montri Rangbah ka jylla, u Dr. Mukhul Sangma ynne ka sngi chirup wa u C&RD Minister u Comingone Ymbon, u Parliamentary Secretary u Robinus Syngkon wa u Commissioner and Secretary Community and Rural Development Community u P. Sampath Kumar da hiar ki cha Laskein Block wow pynkup burom ki ya ki wa psan mrad ha ka yalang wa pynman ha Madan Laskein.
Ya ini i pynkup burom hapoh ka Meghalaya State Livestock Mission toh chibynta yong ki 20 tylli ki Scheme sorkar hei yakrehlang wa ka MGNREGA, MBDA wa Animal Husbandry.
U Deputy Commissioner, u R. Rapthap da e u ya ki kyntien pdiang burom heiwa da ong u wa kani ka Block toh kawa da poi thong hapoh i por wa da booh da ka sorkar jylla neibynta u snem 2017-18 deiwa e yaroh leh ya u BDO, wa kiwa kreh yong oo kiwa da yarap wow pynman sakhiat yeini.
Da pynkup burom ya kiwa psan mrad da u Dr. Mukul Sangma uwa da pynsñiaw yei mynsien wa kmen hei yatoh wa i ku kani ka Block liang wanang deiwa yooluti wa ha kini ki snem wow wan kani ka Block daw man ko kam ka nongmuna ya kiwi ki Block.
Da ong u wa ka Mission Project kam ka psan sniang, ki syiar, ki dakha wa kiwi kiwi da wanrah i yei roi i paar hapoh ka imlang sahlang wei da ye leh u pynku ya kam kini ki jait kaam.
Chooh chooh da ong u wa oo yooluti u wa ki paidbah leh daw leh ki yeiwa klam ki heiwa u man kam ki warep, da ong u leh wa daw kyntu u ya ki khon yong oo wow chim ki yei kaam rep kam wow pynim ya ki.
Da ong u wa ymjooh em kamni heiwa ka sorkar u kreh ko neibynta wow kyntu kynrong ya ka kaam rep hapoh ka jylla waroh kawi.
U Commissioner and Secretary of Community & Rural Development Department, u P. Sampath Kumar, hei klam da ong u wa dap u dei mynsien wa kmen wow yoo yei ku ki paidbah kani ka Block neibhah dei krehlang ki chnong waroh hapoh ka C&RD Block da ku ki ktakam i thong u Dr. Mukul uwa da sdang u ya ini i kaam wow yarap ya ki warep ha kani ka 23 Naiynru 2017 deiwa mang ya ki 50,000 tylli ki manyung ha waroh kawi ka jylla neibynta u 2017- 18 heiwa ka Laskein C&RD da yoh myntoi 1800 ngut ki bru.
Ha kani ka yalang da emlang u D.M Wallang, ADC S.C. Laloo, ADC, EAC, Director of Animal Husbandary & Veterinary CEM, JHADC, Andrew Shullai, wa kiwi kiwi.
Discussion about this post