Jowai: U Paiem Laborious Syiem ynnin ka sngi ka 18 tarik da wai paidbah u ya ka karkhana pynmih umdih wa tip kam ka Calm Industry kawa em ha ka chnong Nongtalang, West Jaiñtia Hills District.
U tre kani ka karkhana toh u Michael Myrchiang uwa na ka chnong Nongtalang hi wei man u leh uwi na kiwa pynmih Film ha War Jaiñtia wa nyngkong wei man u leh kam uwa thoh kot.
Ya kani ka karkhana da chna ha i thaw ka kur Pohchen wei da jied ya i pyrtuid Calm deiwa chimlang yei pyrtuid yong oo, ka kurim u wa ki khon ki ar ngut.
“Kam u bru wa wan naka manyung wa dooh heiwa i kreh chitom nadooh dang khian ha kiwa boon ki kaam, ha u Naiynñiaw 2014 katwa dang em O hei kreh da wan i pyrkhat ha nga dei yi i kaam wa nga ye O u leh wow pynsah naam, wei nga da kynmoo O ya ki kyntien u Soso Tham wa ong wow kreh yow yoh ya ka naam ym du yei baam, kamtæ da rai O yow poi cha kani ka thong,” ong u Michael Myrchiang.
Da pyntip u leh wow pynkrehkaam ya kani ka karkhana da chimpor ko na ki daw wa duna poisa wei da em i por wa da pyrkhat wow kylla noh ka cha ka thaw ri syiar tangwa kattæ leh ym em ran dien u.
Da pynchlur u leh ya ki khynroo khyllood wa ha iwon iwon i kaam wa leh ki ymtoh u dooh mynsien ki wei ymtoh du kiwa mahajon wa ye u ku kamjooh leh ki wa dooh leh ye hi ki u ku.
U Laborious hei klam yong oo kam u kongsan da ong u wa neidaw wa u tre chnong ye u wow sdang ya kani ka karkhana da ye u pynyoh kreh ya ki khynroo khyllod wei heijooh i por da yaroh u ya u Michael wa man u u bru wa klam yei hok wei uwa yieñ ha i hok hei rukom im u wei da kyntu u ya oo wow kreh hok u neini cha khmat.
Da yooluti u leh wa kani ka umdih wa pynmih kani ka karkhana daw pyn pawnaam ko ya ka thaiñ War waroh kawi.
Kiwi kiwa da e i klam ha kani ka sngi kynthup ki ya ka Dr. Solony Bareh Prof. Nongtalang College, u Donstan Khonglah Exporter na Dawki, u Waheh Chnong Nongtalang u Min Lyngdoh, Hat Pohchen wa kiwi kiwi.
Discussion about this post