Shillong: Ka Seng Khasi Mylliem, East Khasi Hills da jop ko ya ka mukotduma wa da yaleh ko pyrchah ya ka Mylliem Syiemship wa kiwi kiwa chong chnong ka Mylliem heiwa ka yungbichaar Meghalaya High Court wa bichaar da u Justice S.R. Sen ha kani ka 7 tarik da e u ka hukum wa hapoh ka ri India katkam ka riti synchaar (Constitution) da e ko ka hok ya waroh wa ye ki u bood wow ngait ya kawon kawon ka niam wa kwah ki.
Kiwa e mukotduma da ong ki wa ki Muslim, ki Christan wa ki Jew da tlep ki ya i metyap wei ini waroh man ko kam chibynta ka niam waphær waphær katwa kiwa chong chnong ka Mylliem wa ngait ya ka Niam Khasi da boon snem da chem chitom ki wow thang ya i metyap neidaw wym em thaw-thang ha Mylliem.
Da ong ki wa ini i daw toh wym e thaw ka chnong ya ki wow thang ya kiwa da khlaad wei da haap leh ki ya ini cha i thaw wa jngai na ka chnong hadooh wa da em ki 6 tylli ki manyung da haap tlep ki ya kiwa da khlaad.
Da dep paanbor leh na u Waheh Chnong wa ha ka Dorbar u Syllai U Lor, Mylliem wow e thaw tangwa ya ini da kyntait ha ka chithi wa thoh ha ka 21-11-2000.
Ka Seng Khasi Mylliem da lai paan bor won ko na u Lyngdoh Raid Mylliem ya i thaw wa khian yow chna ya ka Tpep Thangbru, heiwa ka Dorbar Ki Bakhraw na U San Kur Khatwei Kurka Raid Mylliem da e ko i thaw wa heh kamwa 30 Ft. X 30 Ft. ha ka 10-07-2010.
Kani ka thaw toh ya yong ka Raij wa mantre ka Durbar Ki Bakhraw na U San Kur Khatwei Kur ka Raid Mylliem wei jngai i kamwa 2 Km na ka chnong.
Ha ka 24-09-2016 ki dkhot ka Seng Khasi Mylliem da thmu ki u wow booh moo-yurim wei wow sdang chna ya kani ka thaw thangbru tangwa da wan kamwa 50 ngut ki bru waroh ki Christan kiwa tympra ya u moo-yurim wa ki tiar ki tar wa pynemkaam wow lehniam.
Ha ka 06-11-16 won ki dkhot ka Seng Khasi heipor wa lai ki cha ka yung niam ki da chem wa da em wa ait ha pchem kani ka yung wei da em wa tympiah ya ki yit kani ka yung.
Uwa bichaar da chong pyrkhat u leh yei pyntip u Deputy Commissioner, East Khasi Hills wa poi ki arliang cha ka ya suk wei da dep jied ya i thaw wow chna ya i thaw thang bru wei iwa em ha Iew Mylliem Rim deiwa ong wa ini i thaw toh u dep u chna hapoh 5 bnai.
Neiliang uwa bichaar da ong u leh wa sñiawsih u chem wa hadooh kini ki por dang em ki bru ki wym tip ya ka riti synchaar wei dang leh pyrchaah ki ya ka. Hei sñiaw yong oo samen da ong u wa ka um wa dih i ym jooh kylli ko ya ka niam waka jaitbru, ka thaw wa chong wa sah ym jooh kylli ki ya i kiwa im wei kamtæ ya kiwa khlaad toh yohlaad ki u chong ngiah da iwa suk.
Da pyndaiñ kuna u leh T. 1 Lak ya kiwa chah e mukoutduma ka wow su ki cha u Registrar General wei oo won daw thap u ya kani ka poisa cha ka Bank Account ka Director Social Welfare, Govt. of Meghalaya ki wow pynemkaam ka neibynta ki khynnah wa chah kset.
Discussion about this post