Shillong: Ka Hill State People’s Democratic Party da pynbna ko wa ka phang wa hakhmat dooh wow lai cha ka Election toh wow pynkrehkaam ya ka Article 371, wow pyntikna ya i skem i man tre ya ki chyndaw ki chyiap.
Hawa klam ha ka yalang paidbah kawa da man ynne ka sngi ha Madan Malki, u Ardent Miller Basaiawmoit da ong u wa i wanrah ya ka Article 371 ymtoh sakhiat wa ka HSPDP thmu ko wow pyndooh noh ya ki Autonomous District Council kamwa da pynsñiawthooh bakla da kiwi, tangwa daw pynskem ko yei mantre ya ki chyndaw ki chyiap.
Da ong u wa i yoh ya ka jylla kattu da kynjnoh cha ka 45 snem tangwa ka jaitbru hi da stang da tlor neibhah wa ki paidbah kheiñstiñ ko ya i maya ya kiwa mihkhmat deiwa jied ya ki MLA da i sñiaw ym dei chemphang wei du ki paidbah hi wa ye u pyllait ya ka jylla na i eh i khoo.
U Ardent da syllaad u ya ka sorkar Congress wa ym ye ko wow chna pyrthai hajrong i eh i khoo ki paidbah kam i tih mooyong, i pam dieñ, tih moo tih chyiap, wa kiwi kiwi.
Da ong u wa ka sorkar MUA-II ym em u chna ko ya ki Policy krehkaam wow pyllait ya ki paidbah na kini ki eh ki khoo.
Da beiñ u ya ka BJP toh ka party wa da kha na ka RSS wow pynman ya ka India ka ri kawa em du kawi ka aiñ, iwa mut wow pyndooh yei man kyrpang ki khian paaid wow wanrah du kawi ka niam wa i ngait niam deiwa pyndooh ya ki hok ki paidbah.
Ha iwi i liang da ong u wa i yalok wa ka UDP toh wow pyndooh noh ya i synchaar ki party wa na baar kani ka jylla, kiwa kynthup ya ka Congress wa ka BJP wei wow pynitkna wa daw synchaar noh da ki seiñ ri loom.
Ha kani ka yalang paidbah yong ka HSPDP da sakhi da ki hajar ngut ki paidbah na kylleiñ ka ri-loom Khasi-Jaiñtia wei da yoh yei klam na u Pynwan Sylliang, president HSPDP Ri-Bhoi, u Renikton Lyngdoh na South West Khasi Hills, ka Teilinia Thangkhiew, u KP Pangniang Vice president ka HSPDP, u Martle Mukhim kyrtong na Mawkynrew, wa na u Defender Pakem na Jaiñtia Hills.
Discussion about this post