Jowai: Ha ka sngi 26 tarik uni u bnai ka tayaw lehkmen wa da pynman da ka Seiñraij Khynroo Khyllood Shangpung Pohshnong kawa sdang nadooh ka 21 tarik uni u bnai da poi ko cha wakut heiwa da pynman ya ki yakop waphær waphær kam ka yakop dro dur, pdiah karom, yaleh Chess, yakop rwai, yakop Chaad, klam muk mak (Extempore Speech), puræ poitri, thoh essay, yakop pynrkhai (Laughter Challenge), Riam khyllah (Fancy dress), yakop pynyoo khonboo (Baby Show) wa kiwi kiwi.
Da pynman leh ya ki yalehke Tynre wa jooh yaleh ki manchwa longchwa kam ka lehke dat-moopoint (Kynton moo), yalehke daiñ phliar, pam wyrngaiñ (ya sariem kamka Kabadi), siat khnam, yajol (yalehke thooh syiem ki kynthai), kyr-ih khoo, yakop ngooh blai, kap ken ken (Cane Walk), yakop pynhær phok wa ka khana parom yong rim.
Ha ka sngi kut yong kani ka tayaw lehkmen da pynman khaddooh da ka yakop yañia (Debate), yakop kyntip (Quiz) hei yatoh wei stat yong pyrthai (General Knowledge) kamjooh wei stat yong Blai (Chaphang ka Niam) yeiwa da pynbood won sa ka yakop riam tynre.
Ha kani ka sngi khaddooh da yoh i klam na ka Nelita Suchiang kamka manbei kawa da yaroh ya kiwa kitkaam ka seiñ wei da ye ki u pynman kam kani ka tayaw lehkmen yong ki khon khynroo khyllood kawa man ka laad wo pynwyrngia wei wow pynku næ wow pynchlur ya ki khon khynroo khyllood wow tia ki chakhmat neibynta wow pynyoo pyrthai ya ka sap wa em ki.
Neiliang u Chanki Langbang, Acting Dolloi ka Elaka Shangpung, hei klam yong oo da kyntu u ya ki khynroo khyllood wo chim ki ya kani ka kabu ksiar wow chimbynta ha kam kini ki lehke kiwa yarap wow pynproh ya i jabieñ kamjooh wow pynkilan ya i doh i pran ynong ki.
Da yoh leh i klam na u Kamnipaia Challam, Secretary Lei Synshar Cultural Society uwa da yaroh ya ka seiñ wa da yalam da ki khynroo khyllood wa da ye ki u pynman ya kam kani la tayaw lehkmen neibynta ki khynroo khyllood.
Da kyntu u leh ya ki waheh wasian kam ki manbei manpa wo sñiawbha ki wow krehlang wei wow chimbynta leh ha kam kini ki lehkmen kam wow e bor e mynsien ya kiwa kitkaam kani ka seiñ.
Khaddooh da saam khusnaam (Prize) cha kiwa jop ha ki yalehke waphær waphær ha kani ka tayaw lehkmen ka Seiñraij.
Discussion about this post