Kob u Justine wow Resign hadien 2 snem lada ymye u wanrah biang ya ka C&RD Block ha Wapung

Jowai: U Justine Dkhar uwa man kam u MLA warim ka 6 Khliehriat Constituency uwa dang dep ieh noh yei kaam kam u MLA ha i klam yong oo ynne ka sngi ha ka yalang paidbah ha Wapung hajrong ka yurim wow pyrchah yei chah kyrriah ya ka Wapung C&RD Block cha Lumshnong da ong u, “I kyrriah u Mukul ya kani ka Block toh neidaw yong nga, neibhah da tyrwa ya nga wow yakhun Election MLA naka Congress ha uni u snem tangwa nga ym bien O, tangwa lada em i daw ymtoh u pynchitom ya ki paidbah toh u pynchitom ya nga.”

“Kam u bru ha-oo em boon ki duna, tangwa ini i leh u Mukul toh iwa leh chanam, wei nga ym poi pyrkhat O wow pynhiar dor u pynda oo ya oo hi kam u khynnah ymtoh de kam uwa da heh deiwa leh bor,” ong u Justine.

“Hadien wa yoh yaka Block boon ki paidbah e khublei ki ya nga wei hadien wa rah cha Lumshnong leh boon kiwa pynbaad ya nga, ha-oo toh i hok hi wow pynbaad, nga ym em sñiawrem O neibhah kani ka Wapung C&RD toh ka kurim yong nga, neibhah la 8 bnai da ya chong ya sah wa ka wei da sdang wow chna yung chna sem tangwa wan noh u Mukul Sangma wow rah ya ka, phi mut daka kurim yong nga nga u ieh jem O ya oo?” klam chrai u Justine.

Da ong u leh “Nga sñiawsih O u pynsñiaw ha phi ki paidbah, hei yongsakhiat haka 2 tarik uni u bnai nga da ieh O kam u MLA wei da li psiah O cha ka BJP. Ha ka 9 tarik won da pynmih ya ka hukum wow kyrriah ya ka Wapung Block cha Lumshnong, nga dang mut O wa i ieh kaam MLA toh wow thmu u ong ya ka kurim C&RD Block wow lai mylla O wei hadien wa yoh kamai u wan biang O, tangwa nadien da wan u Mukul uwa rahbor noh yaka”.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

“Ha nga sñiaw heh O wa u Mukul tieñ u nga wym nood O u leh chwa u ieh kaam O, lada toh uwa u dap chynrang toh u rah u ya kani ka kaam heipor wa dang chong O ha ka chuki wa ki paidbah da pynkup ki ya nga. Kamtæ lada ki paidbah u pynjop biang ki ya nga ha u 2018 nga kob O wa lada ym ye O u pynneh yaka Block hapoh 2 snem u ieh noh O yei kaam MLA.”

Chooh chooh da pyntip u wa waroh chi kattu oo yaroh bha u ya u Mukul wa man uwa stat tangwa hawa pait yei leh yong oo, hanpaya man u uwa thlah neibhah hadooh ka kurim yong kiwi dang nood u wow knieh, nalor wa ya kani ka yungkrehkaam leh da chna deiwa tip ka sorkar.

Nalor kitai ki chah pynbaad da ong u leh wa wa ini waroh jia i toh wa em leh kiwa choon kiwa naka thaiñ East Jaiñtia kamtæ da kyntu u wa ymtoh u e laad ya kiwa choon wow chim ya ka bhah kiwi.