Wanrah burom biang u Pynnehbor Mylliemngap ya ka jylla

Jowai: U Pynnehbor Mylliemngap uwa da ksoh biang u yei naam kam u National Champion ha ka sien kawa soo ha ka kyrdan Musical Form Hard Style ha ka lympung yalehke Kickboxing wa pynman ha New Delhi wa tip kam ka WAKO India National Kickboxing Federation Cup 2017-18 ha Talkatora Indoor Stadium kawa pynkut ynne ka sngi.

U Pynnehbor toh uwa na ka chnong Smit Mawmluh kawa em kamwa 20 Km na Shillong wei dang puræ u ya ka Class XI ha Shillong College hanlada man u u bru uwa khian hei rynyieñ wei heijooh i por sikai u pynda oo ya oo hi ha kani ka Musical Form Hard Style da ye u wow yakhun ym du ha ka kyrdan National tangwa kamjooh leh u Asian Champion ha ka Asian Kickboxing Confederation WAKO Asia Championship wa 2016-17 wa pynman ha ka chnong Ashgabat Turkmenistan ha u bnai April 2017.

U Pynnehbor da wanrah burom u leh ym du ya ka yung ka sem yong oo, ka jylla kamjooh ka ri deiwa krehchitom wei da rah u ya ki naam wa boon deiwa krehchitom u khlem em wa sikai ya oo kawa man leh kawa da e mynsien ya kiwi ki khynroo wa ym em wa ye u khanglaad lada em i thrang yong ki samen.

Ha u snem 2014, ha Pune da rah u leh yei naam Best Fighter in Kickboxing wei ha ka WAKO India Cadets Junior & Seniors Championship 2017 wa pynman ha Raipur Chattisgarh da pteiñ u yei man Champion. Da rah u leh ya ka takma Ksiar kawa nyngkong dooh ya ka jylla ha New Delhi ha kani ka kynti.