Jowai: Ka Dorbar Kur Phyllei, Langbang, Langwar, Wett, wa Nowa da pynman ya ka ha ka 27 tarik uni u bnai ha chnong Mukhap heiwa da man ko kawa phooh wa phieñ wa da wan chim bynta na kylleiñ kylleiñ ki para kur na ki shnong waphær waphær.
Ha kani ka sngi da pyllai yakani ka Dorbar da u President ka Kur, u Winis Phyllei wei chwa u sdang ka Dorbar da pynhær ya ka lama da u Dr. Brightstar Langbang wa man leh kam u Adviser, da yoh leh ya i kyntien pdiang burom na u Sheini Wett wa man kam u Assistant Secretary, wei da pynlait paidbah leh ya ka Calendar ka Kur da u Wallam Wett.
Ya kani ka sngi da pynphooh pynphieñ da i rwai pdiang burom na ki manbei ka Unit kur ka chnong Mukhap.
Ha kani ka sngi da yoh leh i kyntien sneiñ kyntu na u Fredericton Langbang, na ka Paianidara Langbang, u Arlan Langbang, u Embhahlang Wett wei na u T.S Phyllei uwa man kam adviser hajrong ka phang “Ia Maia ia tylli Wei ia Bang sneiñ Biang kroo hapoh ka kur ka kmai khnang yow man i kiwa phooh wa krai neipor cheipor”.
Da pynphooh pynphieñ chooh chooh ya kani ka sngi da ki chad tynre da ki khon Khynroo khyllood ka kur na Mukhap, Biar, Shangpung Khliehrangnah, Shangpung Moosyiem, Jowai, Shangpung Mynkrem na Iongkynshur, Sahsniang wa na ki khon wa kha.
Ha kani sngi da pynkup Burom leh ya ki khon Khynroo khyllood kiwa pass bha ha ki exam waphær nadooh SSLC, HSSLC wa ki Degree.
Ya kani ka yachemlang da pynkut da ki kyntien e khublei na u C. Langbang uwa man kam u General Secretary uwa da pyntip leh wa ha u snem wow won u man ka Dorbar Kur u man ko ha Shangpung Khliehrangnah ha ka 19 tarik Duyatra (January) 2019.
Discussion about this post