Shillong: I thap pyrtuid ki kyrtong neibynta ka Election da lai i chaaid chaaid, ynne ka sngi wa ar heiwa da em hadooh sa san ngut ki kyrtong kiwa thap pyrtuid ha kylleiñ ka jylla.
Ha Shillong da em ar ngut ki kyrtong samen (Independent) kiwa thap pyrtuid wa kynthup ya u Lambor Malngiang wow yakhun na Nongkrem wa u Teibor Pathaw na Mawlai.
Hawa yaklam wa kiwa pathai khubor neiliang u Malngiang da tikna u wow jop ha kani ka election deiwa ong wa i jop ha ka election toh chong ha ki paidbah neidaw i chakri yong oo ya ki paidbah kattu la 20 snem.
Da ong u wa lada jop oo daw chimkhia u ya i puræ puthi, i chait i khiah, ka umbaam wa kiwi kiwi wei da kyrmen u leh wow jop kam u kyrtong samen.
Katwa neiliang u kyrtong na Mawlai, u Teibor Pathaw da ong u wa yakhun u kam u kyrtong samen neibhah wa yoo u wa ha kani ka kynti ym em ki party wow jop boon ngut namo wow yoh u chna sorkar samen.
Da ong u wa i mih yong oo wow yakhun toh wow bood ya ki dak-kjat ka bei u wow chakri ya ki paidbah ka Mawlai constituency.
Nalor kini ki kyrtong samen da em sa le ngut kiwi wa kynthup ya u Gabriel Wahlang (INC) na Nongstoin Constituency, u Witting Mawsor (HSPDP) na Mawshynrut wa u Nimarson Momin (UDP) na Salmanpara Constituency.
Discussion about this post