Shillong: Napyrdi ki 374 ngut ki kyrtong wa thap pyrtuid wow yakhun ya kani ka MLA Election neiliang u Chief Electoral Officer (CEO) ka jylla u Frederick Roy Kharkongor hawa yaklam cha kiwa pathai khubor da pyntip u wa em 32 ngut ki kyrtong kynthai nalor ki chynrang kiwa da mih madan ha kani ka Election wow man ha ka 27 tarik uni u bnai.
Da ong u wa ka tnat Election da pynkhreh ko nadong chadong ya ka election wei ha ka 15 wa 16 tarik uni u bnai, u Chief Election Commissioner ka ri daw wan sylli u ya ka jylla wei daw yasyllok u wa ki heh pulit, u Chief Secretary,wa kiwi ki heh sorkar wow pyntikna wa ka Election man ko kawa lai bait wa kawa ryntih.
Heijooh i por da ong u wa nadooh wa pynbna ya ka Election da khyrrup hadooh T. 2.5 lak ka poisa, 125 tylli ki tiar siat, wa kiwi kiwi ki tiar pynpdung.
Ha kani ka election ha kani ka kynti em 67 tylli ki Polling Station næ ki thaw thap vote ki wow sonteri da ki pulit kynthai bait wei daw em 60 tylli ki Model Polling Station næ ki thaw thap vote kiwa da pynbiang ya i emkaam kiwa thap vote kiwa kyrpang.
U CEO da ong u wa ka tnat election da pyllait ko leh ya ka mobile app kawa pyrtuid ka ‘Meghalaya Votes’ heiwa ki paidbah ye ki wow sai (download) ha ki mobile yongki wow yoh ya ki wyrta wa emkaam hei yatoh wa kani ka Election.
Da pyntip leh wa ha kani ka kynti da chah leh ya ki wym em EPIC wow pynemkaam da u Aadhaar Number, næ job card, license kari, Pan Card, Smart Card wa ki Passport.
Ka Constituency kawa boon kyrtong dooh toh ka Rongjeng kawa haap ha East Garo Hills heiwa em 11 ngut ki kyrtong, katwa kawa duna kyrtong kawa em du le ngut toh ka Sohiong ha Khasi Hills, ka Ampati wa ka Bajongdoba ha Garo Hills.
Da pyntip u leh wa ki thaw thap vote waroh em ki 3083 tylli neibhah wa dang em sa kawi kawa dang pynmih ini wot.
Ha kani ka kynti ha ka sien wa nyngkong, daw pynemkaam leh ya ki VVPAT heiwa kiwa thap vote u yoh ki ka slip ka wow pynyoo 7 second ya u kyrtong wa jied ki hadien wa da che i diñ.
Discussion about this post