Jowai: U Jopthiaw Lyngdoh uwa man kam u kyrtong yong ka seiñ Congress naka 1-Nartiang Constituency da pynman u yaka yalang yalap Election kawa khaddooh ynnin ka 24 tarik ha ka madan ka chnong Ummulong.
Ha kani ka yalap Election da emlang leh u Vincent Pala MP ka Shillong kamjooh leh ka heh ki seiñ manbei ka Congress ka Shoba Ojja kawa da wan wow u pynchit ya kani ka yalang.
Hei klam yong u Vincent Pala, da khana u wa ka Congress da dep pyllait paidbah ko ya ka thong yaleh Election namo ka Election Manifesto yong ka seiñ hei yatoh wa kani ka Election MLA.
Da batai bniah u ya ki kaam wa ka sorkar MUA hapoh ka yahkhmat ka Congress da pyndep ko ha kini ki san snem, kamjooh leh da khana u ya ki thong næ ki phang krehkaam kiwa ka seiñ da booh ko lada yoh biang ya i synchaar haka jylla. U Pala da kop u leh wa ka Congress toh ka seiñ ka wow yahkhmat ya ka sorkar kawa thymme haka jylla dei wow jop ko ym duna ya ka lephaw tylli ki Constituency ha kani ka kynti.
U Jopthiaw Lyngdoh uwa man leh u sahep sorkar IAS uwa da chong ngiah, da ong u wa lada ki paid chong chnong ka 1- Nartiang u e lad ki ya oo wow man u u MLA yong ki ha kini ki san snem kiwa daw wan, u wanrah u ya i roi i paar i wym theh chilliang. Da ong u wa kani ka thaiñ dang emkaam bha ko chiboon ki kam pynroi ha waroh ki liang kiwa oo u hap u u pyndep lada ki paidbah pynjop ki oo ha kani ka sien kawa nyngkong kawa wan pan u ya i kyrchaan yong ki.
Ha kani ka sngi da ki hajar ki wa kyrchaan ya uni u kyrtong ka Congress da wan ki wow pynyoo yei maya wa i kyrchaan ki ya oo dei wa mih paidbah ki ha kani ka sngi.
Discussion about this post