Shillong: Ki MDC ka liangpyrchah da chrai bha ki ya u Chief Executive Member (CEM) ka KHADC u Pynshngain N Syiem hadien wa ym ye u e ka pynche heiyatoh wa i pynlut ya ka T.16 Klur wa da saam Work Order u cha ki Constituency wa yakhun MLA ki kyrtong ka People Democratic Front (PDF).
Kini ki MDC ka liangpyrchah wa kynthup na ka UDP, Congress wa kamjooh na ka HSPDP da lai ki wow yachem wa u CEM ha kamra yong oo hadien wa da pynsangeh ya ka dorbar yow paan pynche wa heiwon i rukom da pynlut u ya ka T. 16 Klur wei kammon da e Scheme cha ki kyrtong ka PDF ha chwa ka Election.
Neiliang u CEM ym bien u pyntip wei heini ki MDC ka liang pyrchah da ku i chrai hadooh wa u MDC ka Umsning u Donkupar Sumer da sngoh u ka ka miej yong u CEM.
Nalor i phah pynche ya i saam Scheme, ki MDC ka liang pyrchah da paan ki ya i pynche leh heiyatoh waka Special Assistant Grant kawa da e biang da ka sorkar pyrdi kawa da poi hadooh T. 32 Klur neibhah wa katkam wa ong kini ki MDC, u CEM da ong u wa na kani ka T. 32 Klur da booh T. 28 Klur neibynta wow pynemkaam ha KHADC.
Hawa yaklam wa kiwa thoh khubor hadien wa mih na ka kamra u CEM, uwa yahkhmat ka liang pyrchah u Mansturdy Nongrem da beiñ joor u yeini i leh mon u CEM wow saam Work Order khamtam ha ka por Election ha ki Constituency wa em pyrtuid ka PDF neibhah da pynlut da ka poisa yong ka District Council khlem da tip ki MDC yong ki tai ki Constituency du neidaw wa em ki ha ka liang pyrchah.
Katkam wa pynbaad ki MDC ka liangpyrchah, u CEM da leh embor u deiwa li saam Work Order u cha ki kyrtong ka PDF kam ha Umsning, ha Sohiong wa kiwi kiwi de ki thaw.
Neiliang u MDC ka HSPDP na Sohiong, u Samlin Malngiang wa u MDC ka UDP na Umsning da pynbaad ki wa ha ki Constituency yong ki, u CEM da e kti u ya ki Scheme cha ki kyrtong kyrtong ka PDF wei ym em pyntip u leh cha ki kam ki MDC.
Chooh chooh neiliang u Teinwell Dkhar MDC ka UDP na Shella da ong u wa ini i leh u CEM toh i wym ye u pdiang neibhah ka poisa yong ka KHADC ymtoh ka yong oo samen wow saam u katwa ngait u khamtam cha ki kyrtong ka PDF.
Hawa pynche hajrong ini neiliang u CEM ka KHADC, u Pynshngain N Syiem da ong u wa ka poisa kawa da mang neibynta ka KHADC chong ko ha i mon yong u CEM wa ka Executive Committee wow pynkrehkaam ha kiwon kiwon ki thaw wa em hapoh u pood u ang ka District Council wei ym emkaam u yaklam wa ki MDC ka liang pyrchah.
Hei yatoh wa i e Work Order cha ki kyrtong ka PDF, neiliang u Pynshngain da ong u em i e Work Order cha ki kattu katni ki chnong, tangwa ymtoh neiliang yong oo wei e da e kti cha ka tnat wa pait ya ki kaam pynroi ha KHADC, da pynrap u leh wa kani ka Scheme ye u chim da kawon kawon ka chnong wei da kyntait yeiwa da e ya ki kyrtong ka PDF.
Discussion about this post