Shillong: U MLA ka Mawphlang, u Syntar Klas Sunn ynne da kylli u chaphang ki karkhana ha them Ri-Bhoi wa kynthup ha Byrnihat wa Umiam.
Hawa jubab yeiwa kylli u, neiliang u montri ka tnat karkhana ka jylla u Sniawbhalang Dhar da ong u wa em 8 tylli ki karkhana kiwa da yoh thaw krehkaam ha ki ar tylli ki thaw wa kynthup ha Export Promotion Industrial Park, Byrnihat wa ha Umiam Industrial Area.
Katkam wa ong u montri, ha Byrnihat ki karkhana wa em katni toh ka Marda Industries Pvt. Ltd., Orion Health Foods Pvt. Ltd., Grover Carbonic Pvt. Ltd. wa ka CMJ Breweries Pvt. Ltd. (Unit II), katwa soo tylli kiwi kiwa em ha Umiam Industrial Area toh ka Girik Briquettes Pvt. Ltd., ka Pine Polybacks, ka North East Tubular Poles Pvt. Ltd. waka KR Polymers.
Ki karkhana kiwa ka sorkar e yarap ko lyngba ka Meghalaya Industrial and Investment Promotion Scheme 2016, toh ka Marda Industries Pvt. Ltd, Orion Health Food Pvt Ltd, Gover Carbonic Pvt. Ltd., CMJ Breweries Pvt. Ltd. waka KR Polymers.
U Montri da pyntip u leh wa kini ki karkhana haap ki hapoh ki le bynta, kitæ ki Micro, Small wa Large Industries, wa ki karkhana kiwa pynlut hapoh T.25 lak haap ki kam ki Micro Industries, kiwa palat ya ka T. 25 lak toh ki Small Industries wei kiwa nadooh T. 5-10 klur toh ki karkhana kiwa da tip kam ki Large Industries.
Da pyntip u leh wa ha kini ki karkhana da booh bhah wow thung kreh hadooh 60 na ka 100 ya ki tre jylla.
Heijooh i por da ong u wa katkam ka bui (report) wa yoh da ka sorkar, ka Marda Industries Pvt. Ltd. da thung kreh ko 12 ngut ki tre jylla, ka Orion Health Foods Pvt. Ltd. 6 ngut, ka Grover Carbonic Pvt. Ltd. 11 ngut, ka CMJ Breweries Pvt. Ltd. (unit II) 88 ngut, ka Girik Briquettes Pvt. Ltd. 10 ngut, ka Pine Polybacks 7 ngut, ka North East Tubular Poles Pvt. Ltd. 10 ngut wa ka KR Polymers 8 ngut.
Discussion about this post