Da ka sahkti ksiar e sñiawbha ka JSTCA ya u Anthony Pohshna yei chakri yong oo wa 10 snem

Jowai: Ka Jowai Shillong Tourist Cab Association (JSTCA) ynne ka sngi ha ka yalang wa tbian wa pynman ha Yungwalieh ka Tpep Pale, Jowai ynne i janmiet da pynkup burom ko ya u President yong ka, u Anthony Pohshna uwa da e i chakri wa pura cha ka seiñ la chiphaw snem kam u President yong ka.

Ya kani ka yalang da pynlai da u Vice President ka seiñ u Kerki Lyngdoh, uwa da e leh ya ki kyntien pdiang burom ya waroh kiwa wan cha kani ka yalang.

Da yoh yei klam na u dkhot ka seiñ, u Ricky Laloo, u Assistant Secretary, u Abenego Passah, wa kiwi kiwi kiwa da e ki kyntien yaroh ya u Anthony uwa ka seiñ khut maya ko kam u Ma Tony.

Neiliang u Scretary ka seiñ, u John Lyngdoh hawa e i klam da khana u ya ki kaam ka seiñ heiwa da pyntip u leh wa hapoh i yahkhmat ma Tony kam u President da ye u wanrah ya ka aiñ hapoh ka seiñ wow maham ya ki dkhot ka seiñ wow kamai ki hadien wa dep dih kiad wei da chim leh ya ka rai wow pynchitom ya kiwa leh pyrchah ya ini.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Da pyntip u leh wa kani ka seiñ da sdang ya ka nadooh i por wa em dang du hapoh arphaw tylli ki kari kamai na Jowai cah Laban wei katni hapoh yong ka da em hadooh kamwa ar spah tylli ki dkhot wa ki kari.

Ka seiñ kam ka dak sñiawngooh ya u president yong ka da e sñiawbha ko ya oo da ka sahkti ksiar, u syntu song, wa kiwi kiwi.

U Tony hei klam da e u i sñiawngooh ya ki dkhot kiwa da kyrchaan ya oo wei kiwa da pynman ya kani ka yalang pynkup burom ya oo deiwa ong leh wa khlem i yakrehlang yong ki ymye u leh iwon iwon leh. Ya u Tony da wan synraan da u khon chynrang u yong oo.

Ya ka yalang da pynkut da ki kyntien ngooh blai na u Auditor ka seiñ u Bantei Pasi.