Jowai: Ynne ka sngi ka Dorbar Chnong Rymbai da pynkup burom ko ya u montri rangbah ka jylla, u Conrad K Sangma wa ya u montri ka Revenue and Disaster Management uwa man leh kam u MLA ka thaiñ, u Kyrmen Shylla, hei emlang u Montri ka tnat puræ puthi, u Lahkmen Rymbui, ki MLA kam u Wailadmiki Shylla, u Nujorki Sungoh, wa kiwi kiwi.
Ya kani ka yalang pynkup burom da pynman ha Madan ka Balang Presbyterian Rymbai, heiwa da wan sakhi ya ka da ki paidbah na kylleiñ ki chnong.
U Kyrmen hei klam ha kani ka sngi da e khublei u ya ki paidbah kiwa da e i chaniah ya oo wei da pynjop ki oo.
Da ong u wa em chiboon iwa thrang ki paidbah wei neiliang yong oo u yaleh u wow pynbiang yeitæ wei da ong u wa boi em ki por ymye u leh yeiwa kwah ki paidbah.
Chooh chooh da ong u wa katni da em chiboon ki kaam wa man pyrchah ya ki kynthai wa ki khynnah hapoh ri-loom Jaiñtia wei wow pynwiar yeini emkaam wow kylla i pyn na i sñiaw wa i rukom pyrkhat yong i hi samen.
Neiliang won u Conrad hawa e i klam da e yaroh u ya u Kyrmen Shylla wa ki Montri yong oo kamjooh leh ki MLA yong kani ka sorkar MDA wa katni.
Da ong u leh wa ka ri-loom Jaiñtia man ko kawa embhah tam neibhah wa yoh ko hadooh soo ngut ki Montri katwa ka ri-loom Garo yoh ko du ar ngut donhi, wei kyrmen u wa kini ki soo ngut daw ye ki wow wanrah yeiwa thrang wa angnood ki paidbah.
Chooh chooh da ong u wa ka sorkar MDA yaleh ko wow wanrah ya ki scheme wa ki kaam pynroi ha waroh kawi ka jylla.
Da ong u leh wa iwa eh dooh ya ka sorkar wa katni toh wa em chiboon ki kaam wa ki kreh wa sahteiñ na ka sorkar warim.
Ya ki kyntien e khublei wow pynkut ya kani ka yalang da e da u Rev. SB Lyngdoh.
Kani ka sngi da pynphooh chooh chooh ya ka da ki Chaad, ki rwai, ki chna dur da u chyiap (sand artist), wa kiwi kiwi.
Discussion about this post