Jowai: Ka Protection of Biodiversity & Fishing Association (PBFA) Elaka Raliang chirup wa ki khynroo khyllood ka chnong Mowkaiaw, ka Fishery Co-operative Ltd. Mowkaiaw, kiwa kitkaam ka Synjuk Waheh Shnong Ri Jaiñtia Laskein Block Unit, ki wa sikai waki khynnah skur ka Madan Khliehriat Presbyterian Upper Primary School Mowkaiaw, ka seiñ da lehwarom ki ya ka World Environment Day ha ka 5 tarik uni u bnai ha khloo Rit Dein Sata, Khmutwasain Mowkaiaw kawa man leh ha ka jooh ka thaw wa da thung dieñ wow pynneh pynsah wei wow pynmiat ya ka wow pynman ya ka kam kawi na ki thaw uiñke suwari.
Ha kani ka khloo Rit Dein Sata toh kawa da sumaar wei pynkyrpang wa man ko ka thaw chong ki mrad namo ka Sanctuary.
Ha kani ka khloo da em ki mrad kam ki skai, ki chrieh, ki rbai wa kiwi kiwi ryngkat ki sim ki doh waphær waphær kiwa siaw heiwa da khang ya waroh wymhoi u tynyap mrad ki.
U Secretary ka PBFA, u Lasting Suchiang hawa e i klam da kyntu u wow sumaar wow pynneh pynsah wei wow chakri neibynta i pynmiat ya ka rymaw wei ymhoi u pynjæd ya iwa em ha ka rymaw, wei da kyrpaad u ya ki paidbah wow yakrehlang wow pynneh pynsah ya ka rymaw.
Chooh chooh da ban joor u wa ymhoi wow thang khiar ya ki loom kiwa kam i wow pynjæd ya ka rymaw.
U Secretary ka Synjuk Waheh Shnong Ri Jaiñtia, Laskein Block Unit, u Niawbiang Ting da pynksan u deiwa ong wa ka Rymaw (Environment) wa i chait i khiah man ki kiwa yakrehlang, lada pynjæd ya ka ye i wow dooh ya i chait i khiah.
Kamjooh leh u Lowing Laloo uwa man kam u Waheh Chnong ka Mowkaiaw uwa da chakri lephaw snem ya ka chnong da e khublei u ya kani ka seiñ wow dang ye ko u e i chakri ya ka imlang sahlang neibynta i bha yong ka mynried.
Khaddooh da pynkut da i klam na u President ka seiñ u Pyndap Shadap deiwa e khublei ya waroh kiwa da yachimbynta ha kani ka sngi.
Discussion about this post