Jowai: Ka KSU Ranikor Circle lyngba ka khubor wa phah da u Marconi Thongni, President yong ka, da maham u wow lai khang tala ya ka yungkrehkaam yong ka State Bank of India, Ranikor Branch lada i rukom krehkaam kani ka Branch man ko kamwa man ynne ka sngi heiwa ka seiñ da chem ko wa hapyrdi wa boon ki bru wa mut wow wan emkaam wow sai wow thap poisa tangwa ka Bank man ko kawa thylli khlem wan kreh kiwa kreh lait noh uwa wai wow khang ya kani ka Bank.
Ym du kattæ katkam wa chem wa i yoh ujor nakai paidbah wa chong chnong da chem ya kiwa boon kiwa tkoh haka rukom krehkaam yong kani ka Bank. Kiwa boon kiwa chong chnong nalor wa jooh chem wa jooh khang ya kani Bank wa ym em wa kreh man i por wei da chem ki leh hawa ki pyrchang ki wow lai sai poisa won da pyntip kiwa kreh wa ym em poisa. Katwa ya ki paidbah kiwa mut wow wai Account chimpor daki bnai wow yoh yaka Passbook. Kani ka Bank won manda biang ki wakreh won manda ym em bordiñ da thut i kreh neidaw wa ka Generator leh toh kawa ym biang.
Neiliang ka seiñ, dawa ko naki bor wa toh u pait ya ini kamjooh ya ki bor District wow tuklar ki smat ya ini i duna kani ka Bank iwa da booh yei eh yaki paidbah yong kani ka thaiñ kawa daw yoh noh yaka Civil Sub-division kamwa da kular ka sorkar.
Ka seiñ da ong ko wa kwah ko wow yoo waka Civil Sub-division ka wow wai u man ko kawa biang lut heiyatoh wa ki Bank.
Ka seiñ da maham ko leh ya kiwa kreh ha kani ka Bank wa toh u kreh hok ki dei wow wan kreh tista, wow kreh hok, u pynsmat ya ki rukom krehkaam wei wow pynbiang wei wow pynwiar ya waroh i duna wei lada ym leh kamtæ ka seiñ daw lai khang tala ko ya kani ka Bank lada ym ye ko wow e ya i chakri kamwa da yooluti ki paidbah.
Discussion about this post