Shillong: Uwa yahkhmat ka Parliamentary Party (PP) ka PDF ha ka jylla uwa man leh u montri ha ka sorkar, u Banteidor Lyngdoh da ong u waroh ki soo ngut ki MLA u kyrchaan bait ki ya ka ka sorkar Meghalaya Democratic Alliance (MDA) wa yahkhmat da ka NPP. Ini i klam yong u Lyngdoh uwa man leh u MDC ka PDF toh hadien wa da mih chiboon i kylla ha ka saiñ pyrthai ha Khasi Hills Autonomous District Council (KHADC).
Da ong u wa emkaam ka aiñ wow khanglaad wow chaad ki MDC wah wah neiñ neiñ.
Da pyntip u wa hadooh katni kam u MDC oo kyrchaan u ya ka People’s Democratic Alliance ha KHADC, tangwa da ong won u wa ha KHADC ymye u ong wa katni em u ha ka liang pyrchah mynstep won ye u em ha ka liang synchaar.
Hawa jubab wa lada ka Party u paan pynche ko namo ym paan na ki le ngut ki MDC kiwa lai kyrchaan ya ka Khasi Hills Democratic Alliance (KHDA) wa yahkhmat da ka NPP, neiliang u MDC ka Mawkynrew da ong u wa chong ha ka Party wow pyrkhat hadien wa da rai ka Disciplinary Committee yong ka Party.
Ki le ngut ki MDC ka PDF kiwa lai kyrchaan ya ka KHDA kynthup ki ya u James Sylliang na Mawhati Constituency, U Blanding Warjri na Mawthadraishan Constituency wa u Latiplang Kharkongor na Nongthymmai Constituency.
U Banteidor da kyntait u wa i long i man ha KHADC u ktah ko ya ka party PDF ha ka Election MDC ka wow man ha u snem wow wan wei da pynrap u wa waroh ki Party yachem ki kam kini i eh tangwa hawa kut ka Party daw pynbait ko ya ki kaam yong ka.
“Ym ktah ko ya ka Party ha ka Election wa ki paidbah leh man ki kiwa stat kamwa da sakhi, ki paidbah ym jied ware ki ya ka Party tangwa da pait ki ya u bru wa i rukom kreh u,” da ong uwa yahkhmat ka PDF.
Discussion about this post