Jowai: Hadien wa yoh ujor na kiwa boon ki paidbah kiwa pyllang poisa hapoh ka State Bank of India, Jowai Branch, ka seiñ All Hynniewtrep People United Front (AHPUF) da lai sylli ko ya kani ka Bank ha kani ka 18 tarik heipor kamwa 2 waje i sngi wei da chem ko wa man i iwa sakhiat heiwa hadooh u Branch Manager yong kani ka Bank leh ym em u wa kiwa kreh nadooh ki Cashier wa kiwi chong padai ki katwa ki paidbah kiwa emkaam ha kani ka Bank nadooh i por 10 waje i step da haap yang ki hadooh i por 3 waje i janmiet leh ym yoh ki wow pyndep ya i kaam yong ki hapoh kani ka Bank.
Ha i yaklam ka seiñ wa wa ki kattu katni ngut ki paidbah kiwa wan thap poisa wa kiwi ki kaam ha kani ka Bank, da pyntip ki wa i rukom krehkaam yong kani ka Bank ym man i iwa lai bait lai ryntih.
Neiliang ka seiñ da yoh ko wow yaklam wa kiwa boon ki bru kiwa wan emkaam cha kani ka Bank kiwa da pynsñiaw yei sñiawsih khamtam kitu kiwa wan na ki chnong nyngkyndong wot kitu kiwa chong ha Jowai kiwa da dooh wow lai kreh.
U Secretary ka seiñ ka AHPUF u Chandame Sungoh da ong u wa kani ka Bank toh kawi na ki Bank kawa boon ki paidbah chaniah ki hapoh ka District tangwa i rukom leh yong kani ka Bank da pyndiaw wei da ktah ko ya ki paidbah kiwa emkaam ya kani ka Bank. Ha kani ka Bank hawa kylli, da ong ki wa i duna yong ka toh i duna ki wakreh wa i thut ki kor Computer.
Kamtæ neibynta i bha i miat lang yong waroh, ka seiñ da kyntu ko ya kiwa pynlai ya kani ka Bank wow wan kreh tista ki khnang yow lait u chaniah du ha ki kor wa pynemkaam hapoh kani ka Bank.
Discussion about this post