Jowai: Ka KSU-Jaiñtia Hills District Unit hapoh i yahkhmat u Albinus Lamurong, General Secretary wa u Leningrad Tariang Organising Secretary wa kiwi kiwi ki dkhot da yachem ki bran bran wa u DC ka WJH, u R. Rapthap hajrong i chah kem u Waheh Chnong ka chnong Moolbær ha ki Pulit Assam kawa em ha khappood wa ka jylla Assam.
Katkam ka khubor wa da yoh da ong wa i daw wa chah kem u toh wa chah ka chnong Mowlbær wow chna ya ka skur SSA ha kani ka chnong iwa da lai la kattu katni por. Kani ka skur toh kawa da e bor da ka sorkar Meghalaya hadien boon tylli ki snem wa thrang ki paidbah.
Ha ini i yachem, ka seiñ da booh ko i dawa na ka sorkar wow tuklar hajrong ini wow pynlait noh ya u Waheh Chnong khlem em kyndon neibhah i pynroi ha kitai ki thaw kajia ka Block 1 ye ko u wan na waroh arliang ki jylla katkam i yakut nadooh ki DC wa ki sorkar warim .
Kamtæ neiliang u DC ka District WJH, da kubur u wa em i eh i khoo wow pynbiang ya ki kynrum kynram nadooh nachwa wei chong i ha ka sorkar jylla wow pynwiar ya kam kini ki awri kiwa wan jia na ki por cha ki por.
Ka seiñ da phylla ko leh wa ha i por wa thmu chna ktem pulit Assam hapoh ka chnong Khatkasla, ki pulit Meghalaya ym em leh ki iwon iwon i wow pynchngaaiñ wa paka ya ki paidbah na ki por cha ki por.
Ka seiñ da ong ko leh wa heipor janmiet, da yoh yutip wa uni u Waheh Chnong da lait u na ka kti ki Pulit Assam (Mukoiloom Police Outpost).
Hanla kattæ leh, neiliang u Genl. Secy. ka KSU JHDU da ban joor u ya ki bor sorkar wa toh u chimkhia ki ya kam kani ka kaam khnang wa u em i chongsuk hapoh ka thaaiñ.
Discussion about this post