Jowai: Ka AJYWO Central Body da kyntu ko ya ka sorkar jylla, ki District Council, ki Dorbar Chnong wa ki paidbah kiwa man ki tre jylla wow pait bniah yei wan psiah ki baar jylla chapoh ka jylla khamtam ha kam kani ka por wa ki 40.07 lak kiwa chong chnong ka jylla Assam, ym yoh ki wow pynpsiah pyrtuid ha ka NRC ha kani ka jylla.
Ka seiñ da kyntu ko wow chna ya ki laad yada wei wow sonteri bha ya ki thaw khappood neibhah wa i pynbna ya ka NRC ha Assam daw ktah bait ko ya i yap i im ki tre jylla ka Meghalaya lada ka sorkar ym chimkhia ko wow leh yeiwa emkaam, da ong u MH Dkhar uwa man leh kam u President ka seiñ.
Chooh chooh ka seiñ da ong ko wa kattu da jan dap 50 snem wa da yoh ya ka jylla Meghalaya tangwa ympu em ki aiñ wow pait wei wow yada ya ka jaitbru khian paaid wei ym kwah ko wa kani ka sorkar wa katni wow leh ko kamwa leh ka sorkar wa dadep khamtam ka sorkar MUA-II, kawa nadooh u snem 2014, da klam wei da rai hajrong ka Entry & Expoint wei kiwi de ki laad wow yada ya ki tre jylla Meghalaya tangwa ym poi thaw.
U Dkhar da pynrap u deiwa ong wa ki tre jylla man ki kiwa khian paaid hawa wyrchaw wa kiwi tawon ki jaitbru hapoh ri India katwa kamtæ ymtoh wow chaniah namo wot wow yang ya kiwi kiwa na baar wow yada ya kiwa khian paaid ka jylla tangwa emkaam wow leh yeini pyn da i hi wow yada nei chah tlep ha ki bru wa na baar jylla.
Discussion about this post