Shillong: Ki ar tylli ki seiñbhalang wa kynthup ya ka KSU wa ka HYC da dawa ki na ki bor pynlai ka skurbah ka North Eastern Hills University (NEHU) Shillong wa toh u thung kreh chwa ki da bru kani ka jylla kiwa na ri-loom Jaiñtia wa Khasi ha kani ka skurbah.
Ki dkhot yong kini ki ar tylli ki seiñbhalang ynne ka sngi da lai tia ki cha NEHU neibhah wa da pynman ya ka exam wow thung kreh ha ki le tylli ki kaam wa lait ha NEHU wa kynthup ya ka kaam Finance Officer, Librarian wa Controlling of Examination Officer heiwa kiwa wan wow yaleh exam boon hi toh kiwa na baar jylla.
Ki dkhot yong ka KSU wa HYC da yachem ki leh ya u Vice Chancellor ka NEHU, u Prof. SK Srivastava wow yaklam hajrong i dawa yong ki.
Ha chwa ini ki dkhot yong kini ki ar seiñ da pynman ki ya ka kbai deiwa rah lang wa ki kot rben (Placard) wei da wanmih nyngkong u Pro-Vice Chancellor, u Prof. Henry Lamin hadien wa ki lai tia ki cha kani ka thaw wei hadien da yoh ki wow yachem wa u Vice Chancellor, u Prof. S K Srivastava.
Neiliang u Prof. Henry Lamin, Pro-VC NEHU da mih u wow yaklam wa kiwa mihkhmat kini ki ar seiñ wei da kyrpaad u na ki wym pynthut ya ka exam thung kreh, wei da pyntip u leh wa ya ini i lait kaam da dep pymnih ha waroh ki laad pathai khubor, wei da em leh ka Screening Committee kawa da bichaar ya kiwa yaleh kreh.
U President ka KSU NEHU Unit u James Mawphlang wa u General Secretary u Pynkmenlang Sanmiet da ong ki wa i dawa yong ki wow thung ya ki bru yong i toh kawa da slem bha tangwa boonsien hi da thung kaam du da ki baar jylla.
“Nadooh nachwa ym em ki kreh wa da thung pura namo ki Permanent Post kiwa em kamwa 10 tylli, wei ynne ka sngi won da khut yaleh kreh du ya ki 3 tylli ki kreh wa lait” da ong ki wei da pynrap ki leh deiwa ong wa ha kini ki snem wa da lai da em bait du ki Acting Officer.
Ha iwi i liang won u Welesly Lyngkhoi u Educational Secretary ka HYC da ong u wa ka seiñ da pyrchah ko yei leh mutlop u VC u wym khut yaklam hanlanda da boonsien dadep phah yei thoh hajrong ini.
“I ksoh ya ka kaam Registrar da u bru uwa na baar, da wailaad ko ya oo wow wanrah da ki bru kiwa na baar, i emkaam i wow em da ki bru yong i hi wei ini toh i dawa kam ka seiñ,” ong uwa yahkhmat ka HYC.
Da pyntip u leh wa em 11 tylli ki kreh wa lait katni wei da khut wow yaleh exam du ya 3 tylli ki kreh, wei neiliang ka HYC da e dorkhat ko nadooh u snem 2015 wow dawa u thung kaam pura (Permanent) ha waroh ki kreh kiwa lait ha kani ka thaw puræ wa kynthup ya ka kyrdan Vice Chancellor.
Ha i jooh i por kiwa yahkhmat kini ki seiñbhalang da pyntip ki wa ha i yachem wa u Prof. Srivastava (VC) da pyntikna wa katwa ye u thap chwa ya ki bru na kani ka jylla kiwa da biang ka kyrdan wow kreh ya ki kaam.
Discussion about this post