Jowai: Ha ka 27 tarik uni u bnai ka Diakonia Social and Development Society (DSDS) yong ka Jingiaseng Samla Shangpung Presbytery da pynman ko ya ka pynche paidbah namo ka Awareness Programme hajrong ka Skills and Development (Job Oriented Course) ryngkat wei yakrehlang wa ka Meghalaya State Skills and Development Society (MSSDS) wa ka Supporting Human Capital Development in Meghalaya (SHCDM) yong ka sorkar Meghalaya, ha ka Dong -B ka chnong Mynso.
Ha kani ka programme da emlang u Lambormi Suchen uwa man kam u Skills and Development Officer wa ka Lubarda Pohtam kawa man kam ka District Community Mobilizer kiwa man leh kam ki bru chemphang ha kani ka sngi.
Da emlang leh u Waheh Chnong ka Mynso, u M. Khlem, Tbn. F. Dkhar uwa man u Executive Secretary Incharge ka Jingiaseng Samla Shangpung Presbytery, u Rev Dr. H.C.T Sumer Pastor Incharge ka Balang Presbyterian Mynso, wa ki Dkhot ka DSDS.
Ka L Pohtam da batai ko yei rukom krehkaam ka SHCDM ha Meghalaya wei ya kani ka project da bhah bynta ha kiwa 18 snem chaneiñ wa 35 snem chapoh, heiwa da pyntip ko wa kani ka esikai man ko kawa mynkna heiwa kiwa kwah wow chah hikai ye ki wow yoh myntoi kamtæ.
Da yoh leh yei batai bniah na u L. Suchen ya ki course wa ki kyndon wa emkaam yong ka MSSDS, ha ka Service Sector kam ka Security, Beauty and Wellness, Retailer, Hospitality, wa ki Native Sector (Integrated Framing) kam i ri sniang ri ngap, ri dakha wa kiwi kiwi.
U Secretary kani ka Society u Sarlangki Dkhar hawa e i klam da kyntu u ya ki khynroo khyllood wow chim kabu ki ya kini khamtam hawa dang biang i por khnang wow ye ki u yieñ ha ki yong ki hi ki kjat. Da pyntip u leh wa ka Society daw wanrah ko ya ki programme waphær waphær ki wow pynmyntoi ya ki ha kini ki bnai wow wan.
Discussion about this post