Jowai: Ka seiñ HYC-Jaiñtia Hills District ynne ka sngi da lai yachem ko ya u CEM ka JHADC u MB Rymbai heiwa da e ha oo ya ka dorkhat hajrong i e Trading License wa ki Labour License hapoh ri-loom Jaiñtia.
Neiliang ka seiñ da chem ko wa ki kyndon ha ka United Khasi Jaiñtia Hills Autonomous District (Trading By Non Tribal) Regulation 1954 & Rules 1959 kiwa da pdiang wei pynkrehkaam da ka JHADC man ki kiwa tlot wei emkaam wow pynjanai wei wow pynkhlan chooh chooh ya ki.
Ka seiñ da ong ko wa deiwa leh kamni daw ye u pynkhlan wei wow pynsakhiat wei wow yada ya ka khayi pateiñ ka jaitbru hapoh ri-loom Jaiñtia.
Da kylli ko leh wa lada i e License cha u baar jylla daw yarap namo ym yarap ko ya i yoh i kot ki tre jylla wei heiwon i dur wanrah ko yei myntoi ya ka jaitbru, lada ka Dorbar Chnong ebor ko ya utæ u baar jylla wow khayi u hapoh chnong.
Chooh chooh dapynrap ko deiwa ong wa kiwa wan paan License toh u yoh u ya ka Police Verification kawa biang wei ymhoi u e License cha ki bru kiwa da chah baad ha ka Yung Bichaar hajrong ki kaam wa da leh ki.
Ka seiñ da dawa ko leh na ka Council wow chimkhia wow pynkylla noh ya ki kyndon aiñ khnang wow pynbor ya u baar jylla wow yohbor u na ka Council chwa wow sdang u iwon iwon i khih i kreh hapoh u pood u ang ka Council wei lada leh pyrchah u wow pynchitom ya oo katkam ka aiñ.
Discussion about this post