Pynkup burom ka SMC ka Panaliar ya kiwa sikai ka skur ka chnong

Jowai: Ka School Managing Committee (SMC) Panaliar ha ka sien wa nyngkong da pynkup burom ko ya kiwa sikai ka SMC yong ka kawa em ka skur nadooh ka Govt LPS, ka Upper Primary hadooh ka Secondary School heiwa da pynem burom ko ya ki ynne ka sngi ha Yungwalieh Panaliar ya waroh kiwa sikai ha kani ka skur kam ka dak wa sñiawngooh wei burom yei chakri ki.

Ha kani ka sngi da em leh kiwa heh wasian ka chnong wa kynthup ya u S. Quotient Sumer, u S. Ram Paswet, u Lakhon Shilla wa kiwi tawon ki waheh wa wan pynchit pynsyaid ya kani ka sngi kam chi bynta wow ebor e mynsien ya kiwa sikai.

Ya kani ka program da pynlai da u Chairman ka SMC u Phrangsngi Challam heiwa da yoh ya ki kyntien Ngooh Blai na u Kyllimot Lhuid wa man u Chairman ka Niamtre Committee wei da yoh leh ki kyntien na ka Headmistress ka skur, ka Sawada Bamon heiwa da pynsniaw ko yei sñiawngooh ya ka SMC kamjooh wow ya krehlang met wa mynsien kam kiwa sikai neibynta i bha i miat ka skur waroh kawi.

Da yoh leh ki kyntien na u O.R. Shallam wa man leh u Nominee u Visitor ka University kam u Member ka Board of Management Tezpur University uwa man heijooh i por kam u dkhot SMC uwa da e ki kyntien kyntu kynpham ya ki wa sikai wow man ki kiwa kitkhia hei kaamram yong ki wow man leh ka nongmuna wa bha ya ki khynnah khnang yow nang mih kiwa wan chakhmat ha ka laiñ puræ puthi waphær waphær.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Hadien ini da yoh leh ki kyntien na Waheh Chnong, u Riquoma Rq. Laloo uwa da kyntu ya kiwa sikai wow pynemkaam hok yei sap kam kiwa sikai wow kreh chitom wei wymtoh u hun tang wow yoh tulop neibhah ka kaam sikai ymtoh kawa suk na waroh ki jait kaam lada yanujor wa kiwi tawon ki kreh sorkar.

Ha kani ka sngi leh da pynphooh pynphieñ ya ka da ki khynnah skur dei chaad wow pyn ka-it ya kiwa sikai wei neiliang ka SMC da e kyrpang ko ya ki ki tiar sahkynmoo cha waroh kiwa sikai kam ka dak wow e mynsien chooh chooh ya ki.

Da pynkut ya ka lehkmen da ki kyntien e khublei na u Secretary ka SMC u Ram Sumer heiwa da e khublei kyrpang u ya waroh ki waheh wasian ka chnong.